Saturday, July 17, 2010

نغمه نشاز

تخيل نفسك جالسا فى الاوبرا او جالس فى حفله موسيقيه لعمر خيرت مثلا تستمتع بالموسيقى الراقيه والهارمونى الرائع وتنسجم مع ابداع العازفين وتعيش حاله من النشوة التى تشعر فيها بإنسانيتك .لتجد ان احد العازفين بدأ يعزف نشاز يمر الموقف بسلام بفضل المايسترو ليظهر عازف اخر يعزف نغم نشاز يزداد عازفو النشاز واحد تلو الاخر .لتجد بائع انابيب يخبط على الانابيب بعنف ليبيع بضاعته ..او سيده من بير ام سلطان او عزبه القرود ترمى جردل ميه وسخه من البلكون على الناس الجالسين فى الصاله لتبهدل ملابسهم الاسموكن ..تمادى معى فى التخيل لترى ان بائع الانابيب اصبح يسير معه بائع روبابيكيا ينده فى الميكروفون بيكياااا بيكيااااا..ثم تجد متسول حسنه قليله يابيه ..ثم تجد بائع فول ويليه بائع سميط وجبنه ثم تجد بائعين للملابس الداخليه ينادون باتنين ونص وتعالى بص ..وتفاجأ ب دى جى عالى الصوت عند بائع اللب والسودانى .ومما زاد الطين بله ان العازفين الوقورين بالبدل الاسموكن اصبحو تدريجيا يرتدون ملابس مشجرة ومرة تلو الاخرى اصبحو يتناولون المخدرات ويمسون على بعضهم البعض ..وقد تفاجأ بكابوس اكبر ان عمر خيرت تحول الى أوفه الأياط ممسكا الميكروفون ليقترب من ابتلاعه ليحيي الجمهور ويقول انه يهدى لهم اغنيه يانى يانى يانى مش هاعمل كده تانى ..ولا تكاد تفوق من صدمتك لترى ان الرجل الوقور الجالس بجوارك تحول بقدرة قادر الى سيد العفش يعزم عليك ب جوان بانجو من المعتبر وهو جالس على كرسي وارد فراشه الحاج على الالوسي تاركا شبشبه تحت الكرسي ليفرك بين اصابع قدمه المتعفنه التى تحتاج الى معجون وتترش دوكو من اول وجديد ..هل اهتزت معاييرك وشعرت بصدمه نفسيه ....نعم لقد حدثت لى صدمه نفسيه انا الاخر فهذا مايحدث الان فى مصر ..فكل يوم تزاداد مساحه العشوائيه والقبح والفذارة ..ليس فى الشارع او فى الفن او اوفقط بل تغلغل التعفن فى الفكر ..الله يرحمك يامصر وربنا يسامحك ياحسن ياهلالى يالى قلبت عليا المواجع ببوستك الاخير
تحياتى
ميجوووووووو

6 comments:

Hassan El Helali said...

هي دي كانت مصر يا عبلة
هي دي بقت مصر يا ميجووووو
والله لا يسامح اللي كان السبب
طول ماحنا ساكتين علي اللي بيحصل فينا
نستاهل ضرب الصرم يا عزيزي

Kontiki said...

علية العوض يا مون بيه بقينا فى زمن النشاز و المسخ

آخر أيام الخريف said...

آآآآآآآآآآآآآآآآآآآآآآآآآآآآآآه

Desert cat said...

ليه تقليب المواجع ده بس يا ميجو
سامحك رع يا بعيد

Ms Venus said...

الله يرحمك يا بلدى


بوست معبر جدا يا ميجو

basees@bloggspot.com said...

ويجي واحد يؤلك

وإيه المشكلة يعني؟ ماهي الناس بتصلي وتصوم وزي الحلاوة؟
الدنيا مافيهاش خير، إعمل لآخرتك وسيب الدنيا لاسحابها

تؤلو إيه؟

تحياتي
(لك مش لو)

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق