Monday, August 2, 2010

رمضان المصرى

قبل الهنا بسنه قلت اكون اول واحد يكتب عن رمضان وذكريات رمضان ..رمضان له تاريخ معايا من وانا عيل صغير ..مش معايا انا بس ...مع كل الناس كمان .رمضان يعتبر تراثا مصريا خالصا بغض النظر عن كونه شهر مقدس عند المسلمين ..واى شخص يعتبر ان هذا الشهر هو خاص بالمسلمين فقط فهو مخطئ ..رمضان المصرى له مذاق خاص ومختلف عن اى بلد ..هنا له طقوسه ومزاجه وسحره ..وهذا هو سر الشخصيه المصريه التى تحول اى شئ على طريقتها ..مثل خلطه الحواوشي التى لا يستطيع احد ان يعطيه المذاق المصرى حتى لو جعل المقادير مظبوطه .
زمان وانا عيل صغير كان قدوم رمضان بالنسبه لنا معناه اننا سنقضي شهرا مختلفا عن باقى الشهور ..الروتين السنوى سيتغير فى هذا الشهر
كنا قبل رمضان باسبوع نتقابل جميعا فى الشارع لنجمع المال لنعلق الزينات التى نصنعها بايدينا الصغيرة البريئه ..كانت الزينه عبارة عن خيط طيارات ونشا وورق قديم او جلاد ملون ..وكنا نقص الورق الملون باشكال جميله ونلصقه فى الخيط بالنشا ونتركه يجف ..وبعد ان نعلق الزينه كنا نستعد بصناعه مدفع محلى الصنع ..وهو عبارة عن مسمار من مسامير السكه الحديد نذهب به للحداد ليثقبه ثم نضع مسمار اخر ك كباس ..ونملا الثقب بالكبريت المخلى وندفعه ناحيه الحائط فينتج عنه صوت انفجار ينطلق مع انطلاق المدفع ..لم يكن المدفع فقط من طقوس رمضان ..بل ايضا الفانوس القديم ابو شمعه ..كان له سحر غريب وخيال رهيب ..كنا نعتقد اننا سندعكه يوما ما فيخرج المارد ..وهو مختلف تماما عن فانوس كورومبو وابوتريكه الذى يباع الان الذى لا يحمل شكل فانوس اطلاقا .
كان رمضان يعنى لنا كأطفال : عمو فؤاد والفوازير والف ليله وليله وبرامج المسابقات ..اتذكر انى بكيت يوما كاملا لان النور قطع ساعه حلقه عمو فؤاد فى الوقت الذى لم يكن هناك اى فضائيات تعيد الحلقه التى تفوتك مثلما يحدث الان ..وايضا كان هناك فطوطه الشخصيه الاسطوريه التى عشنا معها سنوات طويله كأنها شخصيه حقيقيه ..وظهر بعدها موتوسيكل فطوطه واى شخص قصير اطلقنا عليه لقب فطوطه .لم انسي ايضا حلقات الاشكيف المخيف الى كان بينيمنا من المغرب ..كنت بخاف انزل اشترى اى حاجه بعد المغرب خوفا من هذا الاشكيف المخيف الى لو طلعلى هاياخد منى الطلبات الى اشتريتها دا غير انه هايرقعنى علقه موت يحرمنى انزل تانى .الاهم فى موضوع رمضان اننا واحنا عيال صغيرين مكناش نعرف ايه الفرق بين مسيحى ومسلم كنا بنلعب وخلاص كنا فرحانين وخلاص مكانش حد بيقولنا عيب تحتفلو مع المسلمين ومكانش حد بيعارضنا لما نطلب فانوس على اعتبار انه شيئ اسلامى كمان صحابنا مكانش حد بيقولهم متلعبوش مع اصحابكو المسيحيين ..الكل كان فرحان كبيروصغير ..الكل كان بيمشي على نفس الطقوس لانه تراث مصرى خالص بغض النظر عن كونه شهر اسلامى مقدس ..عمر ماحد من صحابى قالى متلعبش معانا عشان انت مسيحى ..يعنى ايه مسيحى ؟ مكنتش اعرف ولا هما كمان كانو يعرفو يعنى ايه مسلمين ..احنا كنا نعرف طعم الفرحه والسعاده ..كنا نعرف شكل لمعه الفرح فى عيوننا ..وشكل الفانوس ..وليل السهر يلمنا كلنا على شكل واحد قلب واحد ..مافيش فرق مين ده ولا مين ده ...دا كان زماااان .فى رمضان المصرى
تحياتى
وكل عام وانتم بخير
ميجوووووووو

11 comments:

Kontiki said...

رمضان كريم يا ميجو كل سنة واحنا مصريين متقلقش لسة الدنيا فيها شوية خير

ELVIRA said...

يا يا ميجو فكرتنى بالذى مضى لما انا و اصحابى مسلمين و مسيحيين كنا بنتسابق على شراء احلى الفوانيس
متقلقش النوعية الكويسة لسه موجودة كل عام و انتم بخير مقدما

Tears said...

الحال مش وحش اوى للدرجة دى و لسه الناس اغلبها كويسة بالذات فى الاحياء الاكثر رقيا و تعليما

Anonymous said...

كنا دايما انا و حنا نكلم احمد سيد ساعت المدفع بالظبط علشان نعيد عليه
و كنا نكلمه على تليفون البيت مش الموبايل و كنا نرخم عليه و نعد نرغى معاه فى اي حاجه و هو كمان ما كنش يفوت و لا ليله عيد و الا ويكلمنا الساعه 12 علشان يعيد علينا و احنا بناكل برضو وانت عارف احمد صاحبنا من 10 سنين و عمرى ما حسيت بانه مسلم او مسيحى

George USA

Mowatten Ardi - مواطن أرضى said...

Ya salaam ya Migo! Thanks for the memories... Yaah, kanet ayaam.

Ta7eyatty

strategicalone said...

ويل كم تو رمضان السعودى

MSMO said...

أولا كل سنة وانت طيب
ولسه المصري الأصيل ميعرفش الفرق بين المسلم والمسيحي ولا أي دين أو مذهب تاني
المهم إننا مصريين وبنحب مصر برغم المرارة اللي احنا عايشينها
وبنشارك بعض في أفراحنا وأحزاننا من غير فرق لأن كلنا مصريين
ويا سيدي انا عازمك علي الفطار في أي يوم تحبه في رمضان وهجيبلك فانوس هدية
وهيكون فانوس بشمعة مش من الجداد
:)

Ms Venus said...

كلام صحيح

وكان زمان فعلا

Anonymous said...

الموضوع هايل يا ميجو
كلبيزو

Hassan El Helali said...

كل رمضان مصري وانتم طيبين يا ميجو ويا مشمش ويا صاندو

لاسع افندى said...

كل عام وانتم بخير

ورمضان كريم


تحياتى

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق