Wednesday, May 4, 2011

في رثاء المجحوم - امير الارهابيين

طبعاً في حياتي ما كنت متخيله اني هاكتب بوست عن زعيم الارهابيين اسامة بن لادن
انما اللي خلاني اعمل كدة ردود افعال غريبه من ناس عميت عينها بالحقد والكراهيه والجهل

واحد زي ياسر برهامي
الحمد لله، والصلاة والسلام على رسول الله، أما بعد؛
 فالعالم كله يهنئ "أوباما والأمريكان".. أما أنا فأهنئ أسامة -إن صح الخبر-.. فقد نلتَ ما أردتَ.  ما خرجتَ مِن قصورك وأموالك إلى شعف الجبال وأعماق الكهوف إلا لهذا المصير.. وهنيئًا للمجاهدين.. أن صاحبكم قتل "مرفوع الرأس لم يسلمه الله لأعدائه"؛ مات عزيزًا في زمن الدوران في فلك الأمريكان. أسأل الله أن يتقبله في الشهداء.

وبقيه الافكار المسمومة موجودة عاللينك ده: http://www.anasalafy.com/play.php?catsmktba=25906

غريب قوي منطق الناس ديه ... عم ياسر بيقول لم يسلمه الله لاعدائه ...امال اتقتل ازاي يا عم ... ناس تانيه تقول رحم الله قائدا عظيما شهيدا من المسلمين ...إزاي يعني مش فاهمه .... واللي يقول الله يرحمه كان راعب امريكيا واسرائيل ...هو ده حصل امتى؟ 

في حين ان نفس الناس ديه لا تطلق لقب شهيد على مات في ثورات التحرير ليه بقه

الذي يظهر - والله أعلم - أنه لايصح ولا يجوز إطلاق وصف ( شهيد ) على من مات في المظاهرات والاعتصامات , لما يلي :

أولا : أن الشهادة الحقيقية هي الموت في معركة بين الكفار والمسلمين , بينما القاتل والمقتول في المظاهرات والاعتصامات مسلمان .

ثانيا : حتى من مات على أيدي الكفار لا تكتب له الشهادة إلا إذا كان هدفه إعلاء كلمة الله تعالى , جاء في الحديث : ( قال أعرابي للنبي صلى الله عليه وسلم: الرجل يقاتل للمغنم، والرجل يقاتل ليذكر، ويقاتل ليرى مكانه، من في سبيل الله؟ فقال: من قاتل لتكون كلمة الله هي العليا فهو في سبيل الله) والمتظاهرون هدفهم الدنيا فقط وهم يعلنون ذلك بشكل واضح

ثالثا : أن خروج المتظاهرين من الاصل غير جائز لأنه :
  إذا كان الحاكم مسلما ولكن حصل منه ظلم فلا يجوز الخروج عليه أصلا .
 إن كان كافرا كفرا واضحا فلا يجوز الخروج عليه إلا بشرطين: 1- القدرة على إزالته بأقل الخسائر في الأرواح والأموال. 2- أن يكون البديل المسلم جاهزا لتولي الحكم .

والمتظاهرون يخرجون وهم لا يدرون لمن تكون الغلبة , وليس لديهم بديل جاهز !!! بل إن بعضهم لا مانع عنده من أن يتولى الحكم كافر ما دام سيعطيه من الدنيا ما يريد !
رابعا : أن الشهادة الحكمية التي حكم بها النبي صلى الله عليه وسلم لبعض الأصناف كالغريق والحرق والمبطون .... ليس منها من مات متظاهرا أو معتصما !

خامسا : أن المتظاهرين والمعتصمين يتسببون في أحيان كثيرة بإيذاء للناس وتعطيل مصالحهم بل والتخريب !!! , فكيف يكون مثل هؤلاء شهداء !

سادسا : أن كثيرا من المتظاهرين والمعتصمين تجد عندهم مظاهر البعد عن الدين ومن ذلك التهاون بالصلاة !!!




اما ده قائد عظيم؟؟؟؟؟؟؟؟؟؟؟


امال ده يبقى ايه؟
MishMish

21 comments:

IMSA said...

مشمش :
لا ادري لماذا يتم احتساب ان بن لادن بطلا من الاساس هو مجرد انسان تجرد من من الانسانية فظل يقتل في الابرياء ويروع الآمنين باسم الدين والدين برئ منه ، ثم من قال انه حتى شارك في ضرب برج التجارة العالمي انها كالكذة اطلقناها وصدقناها ، تفكرني بالنكتة القائلة :
اعلن مصدر اسرائيلي ان زوجة ايهود اولمرت حبلى فاعلنت 6 جهات فلسطينية مسئوليتها عن الحدث ..
من قال ان بن لادن مجاهد وهذا الكلام الفارغ انه مجرد عميل للسي اي ايه ابان الاتحاد السوفيتي وبعد الانهيار اصبح ورقة محترقة فلم يعد يجدي وجوده وبصفته عميلا تم التخلص منه فتحول وانقلب على سادته لانهم اساءوا اليه - فيلم امريكي عن عملاء المخابرات حب ينفذه بنفسه - واصبح زعيما لأناس ممسوحة العقل تظن ان ما تقوم به من تفجيرات وترويع للآمنين ما هو الا جهاد ؟
نشر فكر تشددي تطرفي في مصر واليمن وسوريا والجزائر بعد ذلك اصبح بطلا قوميا في عيون من في عيون من يؤمنون بهذا التفكير ويرونه صحيحا
//
تحياتي مشمش وتقبل مروري واسف ع الاطالة

Migo Mishmish said...

IMSA
ايوه كدة
دانا اتخضيت من كم الناس اللي مؤيدة ليه ... وغير كدة يقولوا رمز من رموز الاسلام
وبعدين يرجعوا يقولوا في حملات لتشويه الاسلام
ده لو الدنيا كلها اتلمت علشان تشوه الاسلام مش هيبقى زي اللي عمله المجحوم ده
تصدق انا كلمت واحد زميلي مسلم الصبح وقولت اساله - لحسن يكونوا كل المسلمين كدة
بس الحمدلله قال عليه ارهابي
طبعاً اسامة بن لادن صناعه امريكيه 100% واللي يقول غير كدة يبقى كداب
امريكيا كانت عايزة تضرب الاتحاد السوفيتي من غير ما توسخ ايديها. فجابت صحبنا فهمته انه مجاهد وانه يقدر ينتصر. لما خلصت الحرب اتقفلت حنفيه الفلوس فاتقلب عليهم. بس للاسف امريكيا حضرت العفريت وغلبها علشان تصرفه
تحياتي
MishMish

Migo Mishmish said...

انا عارفه انك هتيجي هنا
ولانك قافل التعليقات في مدونتك
عايزة اقولك فديو المرة دي قتلني من الضحك
بجد مش قادرة امسك نفسي
بس في سؤال عايزة اساله مالوش علاقه بالكلام اللي انت بتقوله
الارنوب البمبي اللي وراك محطوط في الحته بقاله كام سنه
مستنيه اجابتك يا لورنس
تحياتي
MishMish

Andrew said...

امال ده يبقى اييييييييييييييه
هي دي الموضوع

ELVIRA said...

موقع من المواقع دى أسمها أنا سلفى يعنى تساوى أنا حمار مش بفكر
يبقى هنستنى منهم أيه
بن لادن دة مجرد ديل المصيبة هى الفكر السلفى أصلا اللى هيجيب البلد عاليها واطيها دة إذا ما حصلش دة اصلا

Ms Venus said...

كنت بتكلم مع حد مسلم قالى كفاية انه كان بيحارب امريكا الارهابيةههههههههه



بامانة يا مشمش فى عقول عندنا !!!!


مش عارفة الاقى لها وصف

Tears said...

بضم صوتى لاول تعليق

انا صدمت باستطلاعات الراي اللى الاغلبية قالوا فيها انه بطل او مجاهد

مع ان ده اكتر مخلوق شوهه سمعه الاسلام و قتل مسلمين و لم يصيب صهيونى واحد فاين الجهاد هنا؟؟

Kahi ra said...

من يأخذ بالسيف بالسيف يأخذ

ابراهيم خليل said...

رصوا الجماجم على الحيطان ما عاد ودان

الفجر قادم والأدان .. ولكل أجل من كتاب .. ما للبشر قد ساقهم هذا الزمن من الأعتقاد ان هناك إرهاب المكان .. الكل يعلم الكيل بمكيلين .. وان لو عدل الميزان ما كان أرهاب ولا كان مايدعية الأمريكان .. ‘نة قدر الزمان أن نجد أستعمار مقنع يمسك بالزمام مع تحياتى وتمنياتى زيارة مدونتى مدونة الشاعر المصرى ابراهيم خليل أو تصفح جريدة التل الكبير كوم (ابراهيم خليل).رئيس تحرير جريدة التل الكبير كوم.

Msry 7or said...

انا دخلت بالصدفة على المدونة بتاعتك وفعلا بجد مدونة مميزه احب احيكى فيها .. واحب احيكى كمان على موقفك المحايد وعدم التعصب .... بعيدا عن موضوع مؤيد ام معارض لاسامة بن لادن انا معترض على حاجه معينة
--------------
اولا انا مسلم عادى جدا بروح الجامعه وعايش حياتى طبيعى زى اى شاب عادى ..ده مبدايا علشان محدش يقول انا متعصب ولا حاجه
.. بخصوص البوست ده انا شايف ان حضرتك مش ملمة بالدين الاسلامى علشان تحددى امتى الواحد مات شهيد او لا.. انت ذكرتى بعض من المواقف ولكن يوجد مواقف تانية ...زى مثلا اليخرج علشان يدافع عن اهل بيتو ومات ده يبقى شهيد.. ده دليل على ان شهداء الشعب المصرى الى راحو فى احداث الثورة دول شهداء لانهم كانو بيدافعو عن اهلهم فى سبيل ان اهلهم ميتزلوش ويعيشو مستريحين وبدون ظلم...ده للناس البتقول ان الماتو فى الثورة مش شهداء .. لكن فى حاجه مهمه جدا جدا جدا ودى انا اعتقد انا متفرقش فى الاسلام او المسيحية .. الحاجه دى هى "النية" يعنى حسب نيت الواحد ربنا هايحسبو حسب النية ... يعنى فى واحد مثلا اتنين نازلين ورايح المسجد او الكنيسة واحد فيهم رايح علشان يصلى والتانى رايح علشان يلعب .. يبقى الاول هياخد ثواب نزولة والتانى مش هياخد ثواب ... فالموضوع كلو بالنيه ..فى بردو الى كان نازل ايام الثورة علشان يدافع عن حريتو وعن حقو وعن كرامتو ومات ده يبقى شهيد وفى الكان نازل علشان يتفرج او نازل علشان يتفسح ..ده مش شهيد يعنى مش هايحصل على مميزات الشهداء واكيد الشهداء فى الاسلام او فى المسيحية ليهم مميزات عن باقى الناس
_______________________
هي دى وجهه نظرى وتعليقى على الموضوع الى بجد بتمنى انى اكون وفقت فى طرح وجهه نظرى وانى اكون اقنعتك .... ولو سمحتى انا بستاذنك انك متسمحيش بنشر تعليقات تسئ لاى واحد مسلم لانى شفت تعليق هنا على البوست ده بيقول انا سلفى يعنى انا حمار

للاسف ده تعليق غير لائق لان ينشر فى مدونة محترمة
---------------------
بلاش تعملو زى امريكا وتجمعو ان كل المسلمين ارهابيين .. لان ده مش حقيقى

فبلاش تحكمو حكم واحد على ان السلفيين مش كويسين لان كل شئ فى الدنيا فيه الحلو وفيه الوحش ..

شكرا ليكى جدا

Migo Mishmish said...

Masry 7or
اولاً اهلاً وسهلاً بيك
ثانياً: انا مش ملمه بالدين الاسلامي زي اصحابه طبعاً وعلشان كدة جبت الكلام عن الشهادة من موقع سلفي ...اللي هما دلوقتي فاكرين نفسهم اللي فاهمين الدين الاسلامي والباقي سلطة... لو حضرتك خدت بالك هتلاقي اللينك بتاعه الموضوع .... وطبعاً انا مش موافقه على اللي مكتوب ده انا بس بوري الناس عقليات اللي مسمين نفسهم سلفيين دول عامله ازاي
ثالثاً: انا طردت ناس كتير قبل كدة من فاكرين انها طالما مدونة لمسيحيين يبقى عادي نخش نشتم في الاسلام وبرضه طردت ناس مسلمين من اللي بيجاهدوا بالشتيمه وقله الادب علشان كدة علمت كومنت مودريشن
اما موضع سلفي يعني حمار ... انا عارفه انه التعليق في مظهره جارح لكن خليك معايا هل تفتكر ان الرسول والمسلمين الاوائل عقلياتهم كانت زي الاشكال اللي بتطلع علينا اليومين دول ... اعتقد ان ساعتها الاسلام كان انتهى بموت الرسول ...وكمثال لتضويح الفكرة ده لينك لدافع الشيح الحويني عن نفسه في موضوع الجواري واللي بعد ماقرايته قولت ياريتك كنت سكت يا شيخ ومكنتش فتحت بقك تاني اقرا واحكم وشوف هل كلمه حمار فعلاً مسيئه ولا لا
http://youm7.com/News.asp?NewsID=431619
سلام
MishMish

Msry 7or said...

للاسف كلام الراجل ده غلط لان ايام الرسول صلى الله عليه وسلم لما كان بيبقى فيه حرب كان الرسول بيوصى كل الجنود على انهم ولا يقطعو شجره ولا يهدمو بين ولا يقتلو طفل ولا شيخ يعنى رجل كبير ولا امرأه ولا اى حد مش معاه سلاح
دى كانت وصايا الرسول للجنود
-------------
لكن مفيش حاجه اسمها انهم لما كانو بينتصرو فى الحروب كان بيتم توزيع البشر عليهم ده غلط طبعا
اذا كان ربنا محرم بيع الرقيق يبقى الرسول كان هايحللها .. انا اووكدلك الكلام ده خاطئ وليس صحيح
وبالمناسبة كان فى صحابى من اصحاب الرسول كان غنى جدا وصرف كل فلوسة فى شراء العبيد واطلاق سراحهم ..
---------------------
معلش زى مفى بردو ناس وشيوخ مسلمين متعصبين يوجد ايضا مسيحيون متعصبين واولهم هم اقباط المهجر الى مش عايشين فى مصر اصلا ولكن للاسف يتحكمون فى افعال كثير من المسيحين بداخل مصر ... المقصود هو ان اى دين فيه المعتدل وفيه المتعصب ولكن لا يجوز انى احكم على مجموعه كاملة بسبب كلام شخص واحد .. بمعنى ان كلام الشيخ أبو إسحق الحوينى لا يعبر عن الفكر السلفى ككل مثال الشيخ القدير جدا المحبب الى قلبى محمد حسان يعقوب .. الشيخ ده سلفى ولكن معتدل .. كان اول من يشترك فى الصلح بين المسلمين والمسيحين فى اول احداث الفته بتاعت حرق الكنيسة فى محافظة مش فاكر اسمها ... وكان ايام الاستفتاء مبيقولش قول لا او قولو نعم كان بيقولو شوف الى انت عاوزو وقولو ... رجل معتدل ارجو انى اكون وصلت وجهه نظرى وشكرا

Migo Mishmish said...

Masry 7or
ما هو الكلام اللي انت بتكلم عنه ده اسلام اللي احنا عارفينه ومتربيين عليه ...انما اسلام الحويني وامثاله يخوف ...ومعتقدش انه يخوف غير المسلمين بس لكن المسلمين كمان اللي مش عاوزين يرجعوا لعصر الجواري والعبيد

اما موضوع المتعصبين المسيحيين فده شوية مش متفقه معاك فيه اولاً بس علشان تبقى عارف موريس صادق وامثاله من الاشكال الضاله بتوع خالف تعرف دول محدش بيطقه وقناه الحقيقه اللي على الهوت بيرد ...انا اؤكد لك ان الناس دول محدش بيطقهم وان كان في حد بيسمعلهم فدول قله ...انما بقيه اقباط المهجر لولاهم كان زمان اقباط مصر اختفوا من زمان ... لولا مظاهرات وكلامهم والضغط الدولي اللي بيعملوه كان زمانا خلصنا ... وبعدين انا مش فاهمه يعني واحد متعصب مسيحي ...هل انت شوفت واحد مسيحي مثلاً قال محدش يقول للمسلمين كل سنه وانتوا طيبين في اعيادهم .... هل شوفت واحد مسيحي ماسك بندقه ووقف مستنى المسلمين يطلعوا من الجامع علشان يضربهم بالنار يوم العيد ... شوفت انت مسيحي يقف بعد خطبه الجمعه يقول اللهم اجعل اولادهم ونساؤهم غنيمه لنا .... شوفت انت واحد مسيحي يعتدي على جامعين ولا تلاته في اسكندريه ويقتل واحد ويصيب واحدة ست تانيه ويطلع في الاخر مختل ... ياعم ده الجريمة الوحيدة اللي محدش بياخد فيها حكم اعدام هي جريمه قتل المسيحيين او حرق كنايسهم او ممتلكاتهم ... وقبل ما نفل ورا بعض في سفططه ملهاش لازمة هاتلي حكم واحد في القضايا دي اتحكم بعدل ربنا
احداث الزاوية الحمراء 1981
مذبحة اسيوط 1981
مذبحة منفلوط 1990
مذبحة ابو المطامير 1990
احداث امبابة 1991
مذبحة ديروط 1992
مذبحة طما 1992
قتل رهبان المحرق 1994
كفر دميانة 1996
مذبحة ابو قرقاص 1997
قرية بهجورة 1997
مذبحة عزبة داوود 1997
مارجرجس هليوبوليس 1999
مذبحة الكشح 2000
الشماس ثابت اسحق 2006
احداث دير مواس 2007
دير ابو فانا المنيا 2008
وجيه موريس ذكى 2009
كودية النصارى 2009
نجع حمادى 2010
كنيسة العمرانية 2010
كنيسة القديسين 2011
قطار المنيا 2011
كنيسة مارجرس رفح 2011
دير الانبا بيشوى 2011
دير مكاريوس الفيوم 2011
احداث العمرانية 2011
هدم كنيسة صول 2011
ابو قرقاص 2011
قطع اذن فى اسيوط 2011
حرق 3 كنايس امبابة 2011

ولا واحد إتحاكم عن هذه الاحداث.....
راجعهم كويس ولا تنسى ان اللى اتقتلوا و اتدبحوا و اتحرقوا دول مش عصافير و لكن بنى آدمين مثلك
ومع كدة احنا مبنكرهش المسلمين لان عندنا ايه في الانجيل بتقول "فان مصارعتنا ليست مع دم ولحم بل مع الرؤساء مع السلاطين مع ولاة العالم على ظلمة هذا الدهر مع اجناد الشر الروحية " رساله بولس الى اهل افسس الاصحاح السادس ايه 16 ده مش معناه انكم اجناد الشر - بس علشان محدش يفهم غلط - ده معناه ان المفروض اننا نغضب منه هو الشيطان مش البشر
ارجو تكون وجهه نظري وصلت
سلام
MishMish

Msry 7or said...

بصى تعالى نتكلم بصراحة وبدون اى حساسيات احنا لو قولنا فى مسيحين متعصبين هاقولك ايوه فيه ... وفى امثلة كتير وبردو انا مش بنكر ان فيه مسلمين متعصبين .. لكن ارفض انك تقولى مفيش مسيحين متعصبين لا فيه .. هابدا بالناس الكانو بيطالبو بالحماية الدولية ايام اعتصامات ماسبيرو ودول انا عارف انهم كانو قلة وحصل مشادات بينهم وبين باقى المعتصمين على الهتاف ده .. بس ده دليل على ان فيه مسيحين متعصبين .. وفيه موقف تانى بردو حصل معايا انا شخصيا.. اقسم بالله العظيم الموقف ده حصل معايا .. كان فيه واحده عجوزه جدا ندهتلى فى الشارع وطلبت منى انى اعديها الشارع قولتلها اتفضلى يا حجة .. انا قولت الكلمة دى لقيتها بتقولى انت مسلم ولا مسيحى . رديت باستغراب شديد وقولتلها انا مسلم .. لقيتها سبتنى ومشيت .. تفتكرى ده تعصب ولا ايه؟؟
وفي حجات تانية كتير بردو فرديه طبعا زيها زى الاحداث الفردية البتحصل من المسلمين .. وفى حاجه غريبة جدا انا وناس كتير ملاحظينها والحقيقة انا عمرى متكلمت فيها مع حد مسيحى بس انا هاتكلم معاكى فيها علشان نتناقش باسلوب محترم بين اتنين مصريين بعيدا عن التفاصيل الدينية ...
لو انتى معترضة على الكلام الى انا هاقولو دلوقتى ده ياريت متنشريش الكومنت علشان مش مستعد حد يطلع يشتمنى او يسب فى دينى
------------------
الموضوع ببساطة الـ بيدل على ان فى ناس متعصبين
ان للاسف المسيحين مش بيندمجو مع باقى الناس فى الجامعات او المدارس او الشغل الا قليل جدا جدا ودايما تلاقى الجروب بيكون منهم فبعضيهم يعنى مفيش مسلمين معاهم الا لو نادرا جدا دى مشكلة بردو بتخلى الفجوه توسع بين المسلمين والمسيحين .. ارجو ان كلامى ميكونش مدايقك بس الموضوع ده انا ملاحظو من وانا فى كى جى وان وحتى الان فى الجامعة .. وعلى فكره فى مسيحين مش كده وانا ليا واحد صاحبى اقسم بالله انا وهو اكتر من الاخوات وانا وهو بردو بنعد نتريق على الموضوع الى انا قولتلك عليه فوق وهو الوحيد الى كلمتو فى الموضوع ده وقالى معرفش السبب وانا مصدقو وبردو الحاجة الى انا ملاحظها ان حتى المناطق السكنية فى مناطق معينة تلاقى فيها سكان مسيحين بس وملسمين قليلين اوى .. وفى حاجه اخيره الشغل لو شركة مثلا صاحبها مسيحى تلاقيه مش بيشغل فيها غير مسيحين ومسلمين قليلين جدا ميتعدوش على الصوابع... بجد الموضوع ده عاملى روشه ف دماغى ونفسى اعرف ايه سبب الموضوع ده... هل هو خوف من اى بنى ادم مسلم على اساس ان احنا عفاريت مثلا او حاجه ولا ايه ولا علشان بيبقو واخدين راحتهم فى الكلام مع بعض اكتر ولا علشان هما متديين فبيتجمعو مع بعض بس .. مع انى اشك فى اخر واحده لان دول شباب زينا زيهم اكيد معظم الشباب مقصرين فى دينهم الا الى ربنا هديهم طبعا ... عموما ربنا يهدينا كلنا مسلمين ومسيحين والمصريين عموما حتى الملوش دين ربنا بردو يهديه ... انا عارف انى عاملك ازعاج فظيع بسبب الكومنتات الكتير اوى دى بس معلش سامحينى انا فعلا كان نفسى اعمل حوار زى ده مع حد مسيحى بعيدا عن التفاصيل الدينية يعنى نتكلم فى امور عامة التصرفات والكلام ده .. مع ان صاحبى الانتيم ده مسيحى بس بصراحة كل منتكلم فى اى حوار من ده نقلبو ضحك وهزار وتريقة على الانتين ومحدش بيدى التانى معلومة مفيده .. ارجو انى مكنش مسببلك ازعاج على المدونة .. مع العلم انى بكرر تانى كلامى لو فى اى حاجه مش عجباكى فى كلامى انا معنديش اى مانع انك متنشريش الكومنت

وشكرا جدا ليكى

Ramez Nashat said...

بصراحة مدونتك عاجباني جدا
لدرجة اني قضيت اليوم كله اقرا فيها
انا مصري مسيحي و موضوع الخطر الوهابي علي مصر مطير النوم من عيني
ده عنوان مدونتي في السياسة
http://diariesoffrustratedguy.blogspot.com/

Migo Mishmish said...

Masry 7or
اولاً احب ابدي اعتذاري ويمكن كلامي مكنش موفق في موضوع التعصب من جهه المسيحيين ... طبعاً في تعصب بس انا اقصد التعصب البغيض اللي يؤدي في داهيه مش مجرد تراكمات مشاعر نتيجه تجارب شخصيه
وانا بعترف اننا عندنا ناس علقياتهم زي عقليات الاخوة السلفيين امثال الحويني وعندنا ناس متعصبين لدرجه اني بقرف من التعامل معاهم

ثانياً موضوع الحمايه الدوليه ده مكنش حد هيتكلم فيه لو كنت جبت جريمه واحدة من اللي كتبهملك في التعليق اللي فات واتحكم فيها ومكنش الجاني مختل عقلياً او مجهول او ماس كهربائي او مجلس عرفي
وكأن لو المسيحي اتنصف في بلده في ده معناه ان المسلمين مش رجاله

الجروبات في الشغل او الكليه ده اسلوب غلط ومش صح وعلشان تبقى عارف انا خريجه كليه العلوم جامعه القاهرة وكانت شلتنا ولاد وبنات حوالي 14 واحد انا المسيحيه الوحيدة ومكنتش بحب ابداً اقعد مع العيال اللي قاعدين في الركن بتاع المسيحيين ولا ليا علاقه غير باتنين تلاته على مستوى الدفعه كلها والباقيين مكنتش بتعامل معاهم لاني مبحبش قعدتهم مع بعض كنت بحس انهم تنظيم سري
بس انا كمان عايزة احكيلك موقف حصل معايا وانا صغيرة ...ابويا دقلي صليب يمكن من وانا عندي 4 سنين او حاجة فدخلت الحضانه في مدرسه تجريبي لاقيت البنت اللي قاعده جنبي كان اسمها اسماء - فاكرة اسمها علشان بقيانا صحاب اخيراً في اعداي - رفضت انها تلعب معايا وانا صغيرة علشان الصليب قالتلي شيلي ده وانا العب معاكي وعملت رباطيه عليا هي وبقيه العيال اللي في محيطي
تخيل انت عيال في كي جي داخلين ما بيعرفوش يمسكوا قلم ولا يقولوا اسمهم بالكامل لكن عارفين ان الصليب وحش ...فانا بحس ان المواقف اللي زي كدة بتبقى نتيجه خبرات فرديه وترسبات قديمة
بس بعد كدة برضه كان المدرسين بقه بتوع دين او مش بتوع دين يخشوا يقولوا اللي مش مسلمين كفرة وطبعاً انت عيل صغير منتاش عارف ترد تقول ايه
او يقومك المدرس يسألك في صلب العقيدة وانت عيل في خامسه ابتدائي وطبعاً يسأل اسئله معظمها مش مفهوم اصلاً ولما ماتعرفش ترد يقول الجمله الهابله بتاعه هما مش فاهمين دينهم ورؤساء الطوائف المسيحيه التلاته الكبار قافلين على الانجيل الحقيقي وبيدوهم انجيل محرف ... وانت قاعد مش عارف ايه ذنبك في حوار الاديان اللي انت دخلته على غفله ده

اما موضوع الشغل ده فديه حاجة تقرف عموماً انا موقفي واضح من الحاجات ديه ...انا لا بتعامل مع شركة كلها مسلمين ومفيهاش ولا واحد مسيحي ولما اكلمهم في التليفون يقولوا سلامو عليكو ...ولو في تعامل بنهيه فوراً وبرضه لما بتعامل مع شركة كلها جورج ومينا وايريني ومريم ومفيهاش ولا محمد بوقف التعامل معاهم برضه ....لاننا بتعاملنا مع الاشكال ديه بنشجع الطائفيه ... ازاي اكون بشتكي ان الناس مش عايزة تشغلني مش علشان انا مش كفء لا ده علشان انا من على دين المدير اقوم لما ابقى في موقف سلطه وافتح شركة اعمل نفس اللي اتعمل فيا ...انت كمان قاطع ...قول لا لكل واحد حاطط نفسه مكان ربنا وبيحاسب البني ادميين على اعتقاداتهم
ارجو اني اكون وضحت وجهه نظري
في بوست كان كاتبه ميجو زوجي العزيز اسمه ارجوك لا تتحسس انفي
http://migomishmish.blogspot.com/2011/03/blog-post.html
ولو عندك وقت اقراه بمنتهى الحياديه وانت تفهم ليه المسيحيين ساعات بيبقوا منغلقين
سلام
MishMish

Migo Mishmish said...

Rames Nashat
ربنا يخليك وربنا يستر علينا كلنا من الخطر الوهابي
MishMish

Msry 7or said...

السلام عليكم
-----------
من الوضح من كلامك ان انتى كنتى موافقة على موضوع الضغط على الحكومة عن طريق المطالبة بالحماية الدولية... انا هاوضح نقطة صغيره فى الموضوع ده .. الكلام الى انا هاقولو ده بوجهو لاى واحد فاكر ان امريكا او اى دولة اوربية ممكن تحمية...
اولا خلينا متفقين ان امريكا مش هممها مسيحين مصر ولا مسيحين الصين حتى ..خلينا متفقين ان امريكا بتستخدم حقوق الانسان ومصطلح الحرية ستار ورا تدخلها وتحكمها فى شئون دول العالم التالت والعرب خصوصا.. اكيد كلنا كمصريين مش هانحب ان احنا نفضل دوله من العالم الثالث ومشين تحت اوامر دوله تانية بتتحكم فى مصيرنا كلنا وتتحكم فى قرارات البلد .. مش كفايه الكان عملو فينا مبارك ..ده غير ان انا عن نفسى دوقت طعم الحرية بجد ودوقت طعم ان مصر ازاى بقت دولة ليها كلمتها وبقت بترد على اى بيان اسرائيل بطلعو وبقت مهتمة باراء الشعب .. المهم خلاصة الكلام انا عاوز اى حد مقتنع بموضوع الحماية الدوية انا عاوز اقولو كلمة واحده بس ..
"الدنيا لما بتولع مبتفرقش بين مسلم ومسيحى النار بتمسك فى الكل"
---------------------
كنت عاوز اعلق على موضوع زوجك
"أرجوك لا تتحسس انفي "بجد انا عاوز احييه جدا اسلوب رائع فى الكتابة + خفه دم رهيبة ما شاء الله مش بحسدو طبعا +كلام حقيقى وواقعى وبيحصل فعلا وانا كنت عاوز استاذنو انى انقل البوست بتاعو عندى فى المدونة مع تغير العنوان الى (يوم من من ايام مواطن مصرى مسيحى) ده طبعا بعد اذنكو .. ومش هانقلو الا بعد الموافقة
----------------------
خلاصة التعليقات كلها
----------------------
اولا فى مشكلة ومنقدرش نهرب منها ونقول ان مفيش مشكلة
-فى تعصب
-فى عدم ثقافة بين الطرفيين,كل طرف فاكر ان التانى جاى من المريخ ,على رأى ميجو
فيه حساسية فظيعه جدا بين الطرفين فى الكلام وفى التعامل

بس لازم يكون فى تفائل لازم نكون ايجابيين المفروض منستناش ان الحكومة او رجال الدين هما اليصلحلحو بين الطرفين لازم الناس الزينا الفاهمين وعارفين ومش متعصبين هما اليحاولو يحلو الموضوع ده وفى طرق كتير زى الحوار الحصل بينى وبينك كده بعيدا عن التفاصيل الدينية ..لازم يكون فى حوار لازم الناس المش بتتعامل مع الطرف التانى تروح وتتعامل علشان تتاكد انو بنى ادم طبيعى جدا بياكل فول وطعمية وبشجع الاهلى وبيركب موصلات ومفيش اى فرق بين الاتنين احنا الشباب الى لازم نحاول نغير افكر الناس الحولينا لو انا مسلم ولقيت حد مسلم متعصب لازم اروح واتكلم معاه وافهمو ..ولو حد مسيحى بردو شاف واحد مسيحى متعصب يروح ويكلمو ..
حتى لو حد من الطرفين لقى ان رجل من رجال الدين متعصب وبيتكلم بطريقه وحشه عن اى طرف لازم نقف قصادو
------------------------
والله احنا النظبط البلد دى مش رجال الدين المعروفين الى كل ميحصل اى مشكلة يروحو ويجتمعو مع بعض ويتصورو كام صورة وهما بيبوسو بعض وخلاص ..الموضوع ده مستفزنى جدا .. مش فاهم مثلا لما يبوسو بعض كده الناس هتنسى مثلا الحصل؟؟ المفروض رجال الدين يكون دورهم اكبر من كده لازم لما يحصل اى مشكلة ينزلو هما الاتنين مع بعض مكان الحادث ويتكلمو مع الناس ويخدو قرارات فورية لحل الازمة ...
للاسف ان رجال الدين فى الطرفيين ناس كبيره فى السن وبطئ فى الحركة والقارارات لو تخيلنا شاب ماسك مثلا الازهر او شاب ماسك الكنيسة بجد الموضوع هايبقى مختلف هايبقو قريبين فى التفكير من الشباب وهايكون التصرف مختلف بس للاسف ان المناصب دى لازم يكون صحبها عالم فى الدين وده بيبقى صعب للواحد لسه صغير فى السن .. بس بردو انا بكرر ان احنا الى لازم نبدا بنفسنا ونصلح بنفسنا .. وان شاء الله مصر هاتبقى اجمل بلد وان شاء الله مش هايبقى فى مكان بينا للتعصب ..ربنا يحمي مصر والمصريين
-------------------------
انا اسف على الاطالة وبحيكى انتى وميجو مره تانية وربنا يوفقو
وشكرا

Migo Mishmish said...

Masry 7or
في البدايه بس لازم تعرف اني قضيت 3 ساعات وانا بجمع في مصادر الرد بتاعي عليك علشان ما يبقاش كلام مرسل

بص يا سيدي اولاً ما يخص الحمايه الدوليه
اولاً: طلب الحمايه الدوليه بيقدم لهئيه الامم المتحدة وليس امريكا او اوربا
ثانياً: مصر عضو في منظمات حقوق الانسان والامم المتحدة يعني مصر ملزمة بتطبيق قوانين المنظمات ديه
ومن ضمن القوانين قانون حمايه الاقليات
وادي نص القانون كامل وبالعربي كمان
http://daccess-dds-ny.un.org/doc/UNDOC/GEN/N93/076/53/IMG/N9307653.pdf?OpenElement
ولو لاحظت كويس مواد القانون هتلاقي انها مفهاش اي تلميح من قريب او بعيد لاستخدام القوة العسكريه
ثالثاً: اليات الحمايه بتكون عن طريق
تقديم شكاوى للمفوض السامي للاقليات القومية و يتمتع المفوض السامي بحق مطلق في الدخول إلى مناطق الدول الأعضاء، وله أن يتلقى المعلومات مباشرة من مصادر مختلفة بما فيها المنظمات غير الحكومية. ومن المتأمل أن الوجود الحيادي للمفوض سيشجع النقاش والحوار بين الأطراف المتنازعة ويساعد في حل الخلافات
ثم بعد ذلك يكون الضغط على الحكومات من خلال المنظمات الاقليميه ومنها منظمة الوحدة العربيه والمنظمات الحكومية والغير حكوميه
هتلاقي بقيه الكلام على اللينك ده
http://paal.mam9.com/t4398-topic
في اجابه السؤال رقم 48 الاجراءت الدوليه لحمايه الاقليات

ده بالنسبه لنص القانون اما بقه بالنسبه لموضوع النار لما هتولع فهتولع في الكل ...الكلام ده مايتقليش انا اللي بيتم الاعتداء عليا مش انا اللي ببدأ الاعتداء ...انا اللي بيتم تكفيري ...انا اللي بتقتل والجاني بيطلع براءة

اما بالنسبه من موقفي من موضوع الحمايه الدوليه ... فحط نفسك مكاني ... اذا كان قانون بلدي واهل بلدي ظالمني اعمل ايه
تحب مثلاً نكون مليشيات مسلحه ونستخدم "الاسلحه اللي ماليه الكنايس" بدل ما تبوز من الركنه مثلاُ ونرد بقه واللي يحرقلنا كنيسه نحرقله جامع
وعموماً يا سيدي ان ضد طلب الحمايه الدوليه لانها ضد الانجيل
"هكذا قال الرب.ملعون الرجل الذي يتكل على الانسان ويجعل البشر ذراعه وعن الرب يحيد قلبه." سفر ارميا اصحاح 17 ايه 5
لو ربنا مش قادر يحمي شعبه ويحمي كنيسته يبقى ساعتها المسيحيين مش محتاجين حمايه دوليه هيبقوا محتاجين تغيير خانه الديانه في البطاقه ... المفروض اننا الاضعف فربنا يحمينا مش احنا اللي نحميه ونحمي منشأته

Migo Mishmish said...

ثايناً: اتفضل انشر البوست براحتك ده شرف لينا يا عم وعارف كمان لو جبت المصر بتاع النهاردة هتلاقي رساله من امجد ناسان منشورة في عمود مصري اصيل ...هذا الامجد ناسان هو زوجي ميجو ... علشان لو عايز تشوف الصورة بكذا رؤيه

ثالثاً: موضوع رجال الدين ده انا ضدده تماماً ...انا شايفه ان كل مشاكلنا هتتحل بتطبيق القانون بس خلاص ...لما الحكومة بتطبق قانون لتنظيم المرور مش محتاجه انها تجيب رجال دين يقولولنا ايه حسنات هذا التطبيق ... هي محتاجه حياديه تامه واحنا كمان نبطل نبقى مستنين حد يدينا الاذن.... انت عارف انا لو من القائد العسكري في موضوع امبابه ده كنت علمت ايه
كنت نبهت في الميكروفونات انه اللي هيفضل في الشارع بعد 20 دقيقه من دلوقتي هيتم ضربه بالنار وابدا فعلاً في ضرب النار من الدقيقه 21 وبعدين اجيب واحد من هنا وواحد من هنا واشوف اصل الموضوع ده ايه واقدم الجاني لمحكمة امن دولة عليا
لكن للاسف العداله عندنا عاميه وميزانها مايل
اتمنى اكون وضحت وجهه نظري
وعلى فكرة انا مبسوطة بالحوار ده
سلام
MishMish

Msry 7or said...

شكرا على تعبك معايا بالرغم من ان اول لينك مش راضى يفتح معايا بس انا كنت عاوز اوضح انا كنت ااقصد ايه من موضوع البلد لو لوعت مش هاتفرق بين مسيحى او مسلم
-------------
اولا انا عارف ان استخدام القوه العسكرية ده مش تبع القوانين ..بس مش خيار بعيد ..خصوصا وان الامم المتحده لو عاوزه تاخد قرار زى ده كل المحتاجاه انها تعمل اجتماع ويتم التصويت عليه وغالبا مابيكون تصويت بالموافقة ... بس عموما مش هو ده قصدى من كلامى انا بقصد ان بيتم تقديم عقوبات على الدولة المقدمة الحماية الدولية والعقوبات دى من ضمنها عقوبات مادية واعتقد ان مصر مش هيا الدولة الى تقدر تدفع فالعقوبات دى هاتأثر بالسلب علينا كشعب وهتبان فى حجات كتير اوى ..ارتفاع الاسعار الاثتثمار هايخرج من مصر وخصوصا الاجنبى منها وده هايسبب فقدان ناس كتير اوى للوظيفة منهم مسيحين ومنهم مسلمين .. هو ده قصدى من ان الضرر هايبقى على الكل...وفى الوقت الى مصر فيه دلوقتى احنا محتاجين فلوس واثتثمارات مش محتاجين عقوبات وخراب بيوت ناس
------------------------------
اما بخصوص موضوع امبابة ده للاسف لو الجيش عمل كده اولا مكنش حد سمع الكلام خااااااالص بقى .. وهانفرض انو كان بدا فعلا باطلاق النار .ده لو حصل خلاص كده البلد ولعت لسبب بسيط
هتلاقى اكيد حصل اصابات فى الطرفين بس الهيحصل ان هتلاقى كميه اشاعات اتقالت .. ممكن تلاقى واحد بيقول ايه ده ده الجيش كان عمال بيضرب نار على الكنيسة وعلى المسيحين
وهتلاقى واحد تانى هايقول دا الجيش كان عمال بيضرب نار على اى حد بدقن وماشى فى الشارع .. تانى يوم هتلاقى بيان من اى جهه فى مصر وغالبا البيان هايكون من الشارع من خلال مظاهره او اعتصام
---------------
احنا معتصمين لحد ما القوات المسلحة تمشى وتجيب مجلش رئاسى والناس تعتصم وهايحصل بلاوى
----------------
لكن فى خبر انا مش عارف انتى عارفاه ولا لا
القوات المسلحة فعلا قبضت على ناس كتير اوى ف احداث امبابة وكان من ضمنهم البت الجربانة العملت المشكلة دى واتسجنت .. وفى واحد تانى بردو مش فاكر اسمو ايه بس هو رجل اعمال
وفى خبر تانى بردو بخصوص موضوع كاميليا كان فى واحد ابو يحيى حاجه كده كان هو ده بردو مفجر حوار كاميليا وعاملينا صداع بيه ده بردو الجيش حبسة وهايتحاكم
---------------
يعنى متقلقيش الجيش بيتصرف صح وبجد ربنا يكون فعونة
---------------------
بس اهم حاجه فعلا لازم تتعمل ان يتم تطبيق القانون على اى حد فى مصر بدون خوف وبجد لو ده حصل الكل هايحس باعدل والامان ..والاهم ان قانون توحيد دور العبادة ده لو طلع للنور كل المشاكل بتعتنا هاتتحل وهايبقى في مساواة فى كل حاجه .. وفى الاخر كلنا مصريين
---------------
اخر حاجه انا واحده على الفيسبوك كانت كاتبة نفس التعليق بتاعك كده على موضوع الحماية الدولية وكانت مستعينة بالانجيل وبجد ياريت كل الناس تبقى زيكو كده وكل واحد يستعين بالانجيل او بالقرأن ويشوف دينو بيقول ايه بجد لو ده حصل كل مشكلنا هاتتحل
------------
شكرا على تعبك معايا ومعلش صدعتك وانا منتظر موضوع جديد فى بوست جديد علشان اقراه
شكرا
سلام

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق