بصوا يا جدعان احنا من الواضح اننا بنخبط دماغنا في الحيط والثورة دخلت في حارة سد.
السياسه لا مؤاخذه عايزة ناس قذرة تفهم في اللعب القذر.... محاكمة المقلوع واعوانه وسجنهم وتحقيق العدالة ... ده ممكن يحصل في فيلم عربي قديم .... ليه بقه؟
لان المقلوع والاربعين حرامي اللي معاه في طرة مش هما دول كل الحرامية .... لان بالعقل كدة علشان واحد زي المقلوع يقعد 30 سنه يجرف في خير البلد ويبعها بالجمله وبالقطاعي للي يسوى واللي مايسواش مكنش هايتم الا لو كان كل اللي حواليه فاسدين بشكل او بأخر
والفساد مش في طبقه واحدة ولا اتنين لالالالالالالالالالا ده متوغل ومتجدد زي سنان سمكة القرش اللي بتاكل تقريباً كل حاجة ولانها ما بترحمش بيقولك سمكة القرش بيطلعها حوالي 20,000 سنه طول فترة حياتها ... النسيج المسئول عن السنان عندها عامل زي السلالم الكهرباء ...لو سنه اتكسرت تطلع واحد تانيه مكانها - الكلام ده حقيقه علمية على فكرة
وبعدين على راي الليمبي "واحد مصاحب على علوكة واشرف كخه هايطلع ايه يعني؟ .... طيار!!!!!!!!!" وبنفس المبدأ ناس كانت بتشتغل وعايشين ملوك ايام المقلوع وبينفذوا اوامره وبتقولوا عليه الزعيم والقائد هايبقوا ايه يعني؟
وبعدين على علوكة واشرف كخه مش هايسمحوا ان المقلوع يتحاكم الا على جثتهم ليه بقه؟
لان كل الفساد مرتبط ببعضه .... والناس ديه ممكن تولع في البلد بحالها بطرق يمكن مكنتش تيجي على دماغ المقلوع نفسه ... ولعلمكم مش هايبقى عندهم اي نوع من انواع الشفقه او الرحمه لان الناس ديه بتمشي بمبدأ "إذا جاك الطوفان حط ابنك تحت رجليك واجري" ولا هتلاقي واحد منهم بيجري من البوليس ويخش يستخبى في الجامع وهو معاه سكينه ويقعد البوليس والعساكر ساعه الا ربع بره محتارين في قلع البيادات بتاعتهم والمجرم جوه بيحاول يهرب من مدخل تاني للجامع لغايه لما يسمع صوت الاذان فتجيله رعشه ويبص لنفسه ويبص للمكان اللي هو فيه وينزل السكينه ويطلع يسلم نفسه للظابط بعد ما يكون الظابط قلع الفردتين فيستناه لما يلبسهم تاني علشان يتسجن او يتعدم
اللي بيحصل ان الواحد منهم ان الواحد لو دخل الجامع ماسك سكينه البوليس هيخش وراه بالجزم وساعتها هايكون هو دبح المؤذن وسرق صندوق التبرعات وهرب
الحل ايه بقه؟
الحل سهل وبسيط وسياسي وقذر ..... الحل "عفى الله عن ما سلف"
يعني نساوم المقلوع وبقيه الاربعين الحرامي اللي منهم في طرة واللي لم يصبه الدور يا تشتري نفسك برد الفلوس يا تتعدم. واظن مفيش حد فينا عنده شك في مسئوليه المقلوع وبقيه الاربعين حرامي عن الخراب اللي احنا فيه ده ... ولو حصل - ولو انه مستبعد جداً - وحد منهم مات برئ يبقى جزاؤه عند ربنا وبعدين هو مش اول واحد في الافات ماتوا في الدويقه والعبارات وحوادث الطريق وقوارب الهجرة وغيرهم كتير ودول جزائهم في الجنه ان شالله
انما اي حل تاني غير ده فهو تضيع للوقت والجهد لان الوضع اللي احنا فيها ده Fishy او زفر على راي الاجانب .... احنا مشكلتنا اننا حاسين اننا بنحارب اسياد مش بني ادمين. والاسياد ما ينفعش نعيش معاهم في امان ...دول لازم يتطردوا علشان نعرف نقعد فيها
MishMish
7 comments:
هناك بعض البلاد -ومنهم امريكا- يتفاوضون مع اللص بعدم سجنه مقابل رد الموال -ممع ترك جزء له يعيش منه باقي حياته- لكن أظن ان هذا الامر لا يمكن حدوثه عندنا
كان من الافضل ان نتفاوض - وخاصة مع رجال الاعمال- ولا نتورط في سجن احمد عز وغيره من رجال الامال ليس حمايه لهم ولكن حمايه لبلدنا من هروب المستثمرين الذين -بكل تأكيد- سوف يفضلون الجزائر وليبيا والسعوديه علينا لأن هذه البلاد غنيه وعندها تسهيلات كثيره ولا يوجد بها مشاكل مثلنا ناهيك عن وجود مواد خام في الأرض ولا مشاكل في الطاقه ولا يوجد سجن للمستثمرين كما يحدث عندنا
مع الاسف لم تكن خطوه احترافيه ابدا، ولكنها كانت خطوه من اجل إرضاء الناس، لكن الناس في بلدنا لا يفهمون ثمن هذه الخطوه
وهنا انا اتحدث عن رجال الاعمال الموجودين في السجن- اما مبارك نفسه فلا يملك الاموال التي قيل عنه انه يملكها، والسبب ببساطه ان اغنى رجل في امريكا معه 58 مليار وهو بيل جيتس- فكيف يكون مبارك معه 70 مليار؟
أظن ان الموضوع مش سهل كدا نأخذ فلسنا من حيتان.!!! ..لان لو قال انه هتنازل عن ثروته معناه كدا ان ثروته سرقها من الشعب اومال الفيديو بتاع العربية القش التي قسمت ظهر البعير كان فاضل يقول هقاضي المصريين
ومفيش حد هيسيبه احنا بنتكلم ع 80 مليون واحد كل واحد بيفكر بطريقة..ثم ان الراجل عنده جنون العظمة يعني ليه معملش زي زين الهاربين وراح للملك السعودية حبيب الكل ..جنون العظمة بتعمل اكثر من كدا
لو قلناانه وافق هو الحاشية بتاعه تفكر اللي اولادهم ماته واللي اتسجنوا واللي اتعذبوا ف عصروا دول كلهم هيوفقوا!!!
الموضوع مش مجرد فساد بس دا دم كمان نفرض ان الكل وافق تفتكر كدا قضينا ع الفساد ؟الفساد متشرب ومتصل ف أماكن كثير الناس بس اللي هتقضي طول ما هما مش بيسكتوا
لورنس
مش مهم مبارك معاه قد ايه ...انا على فكرة ما زي ما قولت قبل كدة وبقول تاني انا مع اعدام مبارك بدون اي محاكمات او وجع دماغ لانه مسئول مسئوليه مباشرة عن كل اللي احنا فيه
زي مانت قولت المشكله عندنا الاستسهال ... ارضاء الغوغاء اسهل كتير من اقناعهم بالعقل
انت عارف لو كل الحراميه والمجرمين في حق الشعب مسجونين كنت هاقول لازم المحاكمات تمشي لغايه الاخر ...لكن اللي موجودين دول هما اللي كانوا بيطلعوا على التليفزيون والباقيين اللي شغالين في الضل لسه موجودين وبقوه والخوف من دول لانهم بيحاربوا معركتهم الاخيرة ... يا ينتصروا يا يخشوا القفص زي المخلوع
ياسمين
لو تفتكري اني قولت ان الحل ده حل قذر ومؤرف وفيه بيع مبطن لكل مبدء
لكن هتعملي ايه وكل الكلاب الضاله اتملت على الثورة والبلد والناس وبتنهش فيها بلا رحمه
هتعملي ايه وانتي شايفه ان الثورة كل يوم بيتكسرلها رجل ويتكسر لها ضلع ويتفقع لها عين ...لغايه لما شكلها بقى دميم وكل واحد عنده جلدة حنفيه بتنقط بقى يلعن الثورة لانها السبب
الناس ديه مش هاتسكت وبقالهم 9 شهور بيلعبونا على الشناكل واحنا كل مرة بنقع وهما كل مرة بيكسبوا نقطة جديدة
انا خايفه يجي اليوم اللي نلاقي فيه حال مصر قبل 25 يناير بقى زي حال مصر بعد 25 يناير وكل اللي اتغير وش السيد الرئيس العكر الى سيد رئيس عكر برضه
لو لاحظتي العناويين النهاردة كنتي هتلاقي ان السيد المشير راح يفتتح تلات مصانع ... اراهن انهم كلهم كان اسمهم مصنع مبارك لاي حاجة ... المشير يروح يفتتحهم ليه؟ هو وزير الصناعه ما ينفعش ... مش قد المقام ...غير مختص
الحل من وجهه نظري اننا نتفاوض معاهم يغروا في داهيه وياخدوا شوية فلوس يعيشوا بيها ويسيبوا البلد ويروحوا بقه السعوديه يروحوا ساحل العاج ...اهي المركب اللي تودي بدل ما البلد هتولع بسبب شوية حراميه معدومي الضمير
MishMish
ياعزيزي ليه تدفع اكتر لما مش ح تتدفع بعدين...كله حيخرج وببلاش ومن غير ولا مليم ...اذا كان اللي بيحاسب تبعه....
المشكلة مش في محاكمة الفاسدين .. يا سيدي إنشاللا ما عنهم إتحاكموا و إنشاللا ما أخدنا منهم فلوس
الأهم عندي هو أن الفساد يتشال من جذورة و نضمن أن اللي أفسدوا الحياة السياسية ما يرجعوش تاني
للاسف متفقة مع رأى تركيب
اللى بيحاكمه تبعه يبقى هو يخاف من ايه او هيساوم على ايه ؟
اسفه على التاخير في الرد بس انتوا عارفين ان الواحد كل يوم بيصحي على مصيبه انيل من اللي قبلها
Tarkieb & Ms Venus
تصدقوا لو ده حصل يبقى مفيش عندي غير تعليق واحد : احيه يا ابو سوسو احيه
على باب الله
ما هو الفساد ده مينفعش يتشال من جذورة
احنا ينفع نردم عليه دلوقتي ونشتغل وكأننا ما نعرفش حاجة ونبدأ صفحه جديدة ... نطبق مبدأ هنا ودلوقتي هانتصرف ازاي
لان الفساد يا صديقي متجدر في كل عيشتنا حتى في الهوا اللي بنتنفسه
فطلب حضرتك - في رائي - يستلزم الابادة الجماعيه لكل المصريين
MishMish
Post a Comment