Monday, October 17, 2011

بقرة حاحا مش هاتقلع الحجاب ... على الاقل دلوقتي

لسبب واحد بسيط؟ وهو انها وبعد كل النهب ده فيها النفس وهما ناويين على خرابها
وعلشان تفضل البقرة تحت ايديهم لازم يلهوا صحابها وبحسبه بسيطة الموضوع مش محتاج غير تضيع 24 ساعه من اليوم كل يوم
ومايقدر على تضيع الوقت غير اتنين السحرة وبتوع التعتيم
السحرة شغلانتهم يقعنوا اصحاب البقرة ان في اسياد طول الوقت غضبانين وزعلانين ومش راضين وعسسهم مالين الدنيا قاعدين للسقطة واللقطة ومحدش معزور ... وكله هيجي عليه الدور
وسبب فقرهم غضب الاسياد ... ويفضلوا العباد يلفوا على الاوليا ويخرجوا من حضره يدخلوا زار يمكن ترضا الاسياد. واهم حاجة يفضل الحجاب لافف عالراس
والبقرة تنادي وتقول يا ولادي ... حاحا ... ولاد الشوم ... حاحا ... رايحين في النوم



وبتوع التعتيم وظيفتهم يضيعوا اللي فضل من الـ 24 ساعه بتاعه اليوم ... وكل يوم
كل يوم نفس الكلام ونفس الضيوف ونفس الشتايم ونفس الفتاوي ونفس المشاكل ونفس الضحايا ونفس الجناه ونفس النهايه لا هي نار ولا هي رماد وهلما جرجر. واهم حاجة يفضل الحجاب لافف عالعين 
والبقرة انقهرت ... حاحا ... ف القهر انصهرت ... حاحا ...وقعت ف البير ... حاحا ... سألوا النواطير ... حاحا ... طب وقعت ليه ... حاحا ... وقعت م الخوف ... حاحا ... و الخوف ييجي ليه ... حاحا ... من عدم الشوف 
بعد مرور 9 شهور من ثورة لم يحدث بعدها شيء
MishMish

3 comments:

ياسمين said...

بجد أنا نفسي أعرف حاجة دلوقتي المطالب الفئوية كل وزير يطلع يقول مطالب مشروعة ويسيب الناس ترن ترن وبعد كدا يحصل حادثة ماسبيرو..وبعدين الناس دول بردو مطالبهم مشروعة ..طيب بدل مشروعة ياعم الحاج ما تنفذ أو ع الأقل قول انا ممكن اعمل كدا ياجماعة وكدا لا بعدين والبلد فيها مش الإعلام يقولك المصريين هيعيشوا في مجاعة كمان 5شهور وادينا لسه عايشين ومش حصل المجاعة..بس هما نسيوا يقولوا حاجة أن مظاهرات ماسبيرو كان فيها كنتاكي وكدا يبقي كملت .الله يشفيهم يارب ويحفظ مصر وإن شاء الله خير ..نفسي بئا اشوف رئيس قبل لما اموت أمنية حياتي ياتري هعيش للحظة دي

Tarkieb said...

المجلس العسكري مش عايز يعمل حد اقصي عشان مرتباتهم اللي بالملايين ما تروحش...فاكر القصري لما كان بيقول هو انا قبضت والله ما انا فاكر اقبض تاني...هو ده النظام دلوقتي كله بيقبض تاني وتالت وسايبين الغلابة تموت

Ms Venus said...

مرور 9 شهور من ثورة لم يحدث بعدها شيء


مش هقول حاجة بعد الجملة دى

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق