Tuesday, April 15, 2008

!!! تسقط الحكومه

حد يقدر يقول غير كدا ؟؟ تسقط الحكومه.. تسقط الحكومه.. خلاص مابقاش حد قادر عليها ..افترت وبقت جبارة انتقدها زى مانت عايز بس هى هاتعمل الى هى عايزاه ..دايما تتدعى الفقر وان الميزانيه لاتسمح بأى علاوات او اضافات مع ان الفلوس فلوسك وانك تعبت على ماجبت القرش ،الفلوس دى هاتاخدها منك باى وسيله ، بالكلام الناعم ، بالخنصرة من ورا ضهرك ،باى وسيله مشروعه او غير مشروعه ..المهم انها هاتاخدها هاتاخدها بحجه انها وراها مشاريع كتير ووراها بلاوى محتاجه فلوس وان كله لمصلحتك ، ومش من مصلحتك انك تسأل الفلوس دى رايحه فين ولا جايه منين اسكت وخلاص والا هايكون مصيرك الرجم كالساحرات ..مش مهم انها تصرف الفلوس على الحاجات الهايفه والحاجات المهمه تتأجل ، دايما تصريحاتها مضروبه ماتفهمش منها حاجه ،هى حكومه كوارث، ودائما تلقى باللوم عليك وانك السبب فى الكارثه مع انك حذرتها مئات المرات، هى حكومه لاتعرفك فانت من طبقات الشعب الكادحه ،دائما تخدعك بالكلام المعسول من اجل ان تصل الى غرضها فقد تريد مثلا ان تضمن صوتك فى شيئ ما وتضمن انك لن تعارضها ،لكن المشكله مش فيها المشكله فيك انك طيب وبتصدقها وتمشي وراها لانك غلبان وهاتفضل طول عمرك كدا ..وتفضل تعيش على امل التغيير لكن انسي ياعمرو مافيش تغيير، التغيير هايكون فى شكلها بس انما فى سياستهاعمرها ماهتتغير ،دمك هو الى هايتغير انما هى استحاله دا قدرك ونصيبك ..فتعامل معها على هذا الاساس لانها ودن من طين وودن من عجين ...
ملحوظه : هذا المقال ليس له اى مدلول سياسي ..هذا المقال موجه للمتزوجين فقط بس ابقو خدو بالكو لا الحكومه تشوفكو وانتو بتقروا المقال دا
ميجووووووو المتزوج حديثا

2 comments:

Desert cat said...

هههههههههههه
وانا عمال استغرب واقول هى الحكومة اصلا بتقولنا كلام معسول ولا بتنيلنا
دى الحكومة بتدينا على قفانا
وبتاخد اللى فى جيبنا غصب عنا ولو مش لاقيت فى جيبنا حاجه بتعمل لنا محاضر علشان نستلف او نسر قاو نعمل اى حاجه المهم ندفع
مشمش دى عسل
سلم لى عليها كتيرررر
تحياتى

Migo Mishmish said...

بيان من الحكومة
حيث ان الحكومة قامت بقراءة هذا البيان الذي يحتوي على معلومات مضلله من قله مندسه تحاول زعزعه الاستقرار الداخلي وتعوق مسيرة الاصلاح الاقتصادي الذي تنتهجها الحكومة. لذا وجدت الحكومة ان الضرب بيد من حديد على ايدي مثيري الشغب ومكدري الامن العام هو الحل الوحيد لضمان رفع مستوى معيشه الشعب وإستكمال مسيرة الاصلاح نحو غذ افضل واتخذت الحكومة القرارات التاليه:
اولاً: يجب على افراد الشعب التواجد اما في اعمالهم او في بيوتهم ويحذر تماماً التواجد على المقاهي ولو لنصف ساعه يوم الخميس للترفيه عن النفس
ثانياً: نظراً لإضطرار الحكومة لترشيد النفقات لإستخدامها لمصلحة الشعب تقرر تخفيض المصروف / المرتب الى الحد الادني حيث اننا في مرحله محورية سيتبعها خير وفير - مش عارفين هايجي امتي - وتصادر فوراً اي علبه سجاير ويسمح فقط تدخين السجائر الفرط بمعدل 3 سيجارة في اليوم وما زاد عن ذلك يخصم من حصه الغد
ثالثاً: نظراً لان الحكومة حامل ونفسها غامه عليها طول الوقت ولانها مشغولة في البحث عن اسم ولي العهد لذا من دافع الواجب لازم على الشعب القيام بجميع اعمال النظافه والاكل والشرب والغسيل واحضار الشكولاته يومياً علشان نفس الحكومة تتعدل
رابعاً: ولان الحكومة في انتظار ولي العهد قرار رئيس الجمهورية بتأميم جميع موراد وممتلكات الشعب لاستخدامها فيما يهم الامة
خامساً: نشكر الزعماءالذين يتفهمون موقفنا وحمايتنا لشعبنا العزيز ونحص بالذكر فخامة السيدة قطة الصحراء والتي تدعمنا دائماً.
ونحن نثق في المواطنين الشرفاء وفي امتثالهم لقرارات الحكومة التي ثبت بالدليل انها دائماً الاصح والافضل
love,
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق