Tuesday, September 23, 2008

شخص مبالغ فيه


..هو ضخم الجثه وقلبه اكبر من جثته ..من الصعب انك تلاقى واحد زيه فى الزمن دا ..مخلص جدا لاصدقائه بطريقه مبالغ فيها) ....مواعيده مظبوطه بطريقه( مبالغ فيها) ....فى وقت من الاوقات قبل ماتجوز مشمش ..كانت عندى صدمه عاطفيه حاده وماكنتش بحب اخرج من البيت ..لقيته مرة واحده طب عليا وقعد يتكلم معايا وفجأه لقيته بيعيط زى العيال الصغيرة لانى صعبان عليه ..كأنه بالظبط هو الى خد الصدمه ..بصراحه صعب عليا وقعدت اطبطب عليه واقوله معلش ..الدنيا مش بتقف على حد ..خيرها فى غيرها وهو نازل عياط ..صاحبى ده ملكى اكتر من الملك ..يعنى فى جنازة والدى الله يرحمه ..كان هو اول واحد موجود فى العزاء ..واخر واحد مشي ..اروح البيت الاقيه موجود هناك ..يواسي اخواتى شويه.. وشويه يواسينى ..بصراحه الراجل دا مخلص لدرجه الاستفزاز ..بيعمل كل حاجه بضمير ..ساعه تجهيز الشقه بتاعتى انا ومشمش كان رجل المهام الصعبه ..انا طبعا من ذوات الهياكل العظميه المميزة الواضحه للعيان.وهو ماشاءالله عليه ربنا يحرسه من النوع العنتيل، مجرد تليفون صغير الاقيه جاى يجرى يشيل انبوبه بوتاجاز يشيل العفش..كل ما اعجز عن شيله او تركيبه يقوم هو بالمهمه .

الحاجه الوحيده الى بتضايقنى من صديقى(المبالغ فيه ) .لما ييجى ينادى عليا من الشارع ..مش بينادى عليا بس ..دا عملى شهرة واسعه فى الشارع وفى المناطق المجاورة ..ابقى نايم مثلا فى امان الله وفجاه اسمع صوت زى الطيارات الى بتسبق الصوت ...يا ميجوووووووووو..اجرى على البلكونه ابص الاقى الناس فاتحه الشبابيك والبلكونات ..الى واقف شعره منكوش عشان لسه صاحى من النوم واللى واقف بملابسه الداخليه ..وكلهم بيبصولى شذرا ..طبعا بعد ظهور الموبايلات اتفقت معاه على رنه معناها انه واقف تحت البيت ومستنينى .. وطبعا الموضوع دا عكننه ..جدا جدا .


اجمل حاجه بقى لما تروح تتفرج معاه على ماتش ..هو اهلاوى اكثر من صالح سليم ومختار التتش ،لن انسي يوم ماتش الصفاقسى التونسي فى نهائى كاس افريقيا ..كان بيموت لحد ما ابوتريكه جاب هدفه القاتل فى اخر (فانيه )على راى سعيد صالح ..فجاه تحول الى فيل هارب من السيرك ..خدنى حضن ..طبق ضلوعى .وخلانى عامل زى رغيف الفينو ابو بريزة ..وقعد يصقف بايديه (مقاس 49 )وكأنه ماسك كرسيين بلاستيك فى ايده جووووووون ..وفجأة قعد على الكرسي البلاستيك ..الرجلين بتاعت الكرسي ماستحملتش وطرقعت مرة واحده ..نزل صديقى مكانه واغمى عليه ..تجمعنا حوله حتى افاق من الغيبوبه ..لكنه اتضح بعد ذلك انه عمل كدا عشان مايدفعش تمن الكرسي الى كسره !...

بالرغم من ضخامه حجم (صديقى المبالغ فيه) الا انه يخاف من الكلاب خوف اليابانيين من قنبله هيروشيما ..بمجرد ان يسمع صوت كلب فى الشارع يتحول الى طلقه رصاص تجرى بسرعه 250 عقده فى الثانيه .

دائما يتصل بى صديقى (المبالغ فيه ) فى اوقات عصيبه يا اما فى الحمام يا اما باكل يا اما نايم ..معرفش زى مايكون منشن على المواعيد وارد عليه.. يأكد عليا انى هاقابله الساعه تمانيه بالظبط، وبعدها يتصل تانى يأكد عليا انى مش هانسي الميعاد ،والساعه سبعه ونص يتصل ياكد عليا انى مش نايم وانى صحيت و انى لبست ..وهكذا

صديقى( المبالغ فيه )..يشبه السنيده فى الافلام العربى ..زى عبد السلام النابلسي وعبد المنعم ابراهيم والشاويش عطيه ..هو ليس البطل فى قصه حياتك ولكنك لاتستطيع الاستغناء عنه ..لانه يملا فراغ الفيلم ويحرك الاحداث بدون ان تشعر.. لا يمكن تخيل احداث الفيلم بدونه .. تستطيع ان تستأمنه على ادق اسرارك لانه كاتم اسرار بطريقه (مبالغ فيها )..وتستطيع ان تطلب منه اى مهمه فيؤديها بدقه (مبالغ فيها ..) تستطيع ايضا ان تنام وترتاح لانه موجود فى حياتك ..فهو موجود فى افراحك ليفرح بك من قلبه... ومعك فى احزانك ليحزن معك من قلبه ..هو انسان نقى القلب يحبك لشخصك وليس لاى غرض اخر .. حينما يختفى صديقى المبالغ فيه فانى اشعربفراغ كبير واشعران الصورة ينقصها شخص مهم

....اعتقد ان فى حياه كل منا صديق(مبالغ فيه )لكنه لا يشعر بوجوده


ميجوووووو

من فوق سور البلكونه

14 comments:

Anonymous said...

تعرف انى انا كمان عندى صاحبى المبالغ فيه
شوف يا سيدى هو ذو اطول وجه فى العالم طيب و غلبان موجود فى وقت الشده مواعيده مالكشى عليها ماعدنا يبقى الساعه 7 الساعه 8 يبقى لسه منزلشى من البيت بس مش مهم انا كمان بكون لسه نايم كانت احلى حاجه انك تشرب فنجان القهوه و السجاره بتاعت اجتماع الجمعه و نلعب الطاوله و نعذب صاحبنا التالت لما بيخسر العشره امام 100الف متفرج و لا زمان لما كنا بنلعب برطوس و الكلمه الشهيره اتلحلح يا لوح و هانروح بعيد ليه و اسكندريا و خالد ابن الوليد و ريرى (توضيح ريرى دا محل مانجا )على العموانك اسواحاجه انك تبعد عن اصحاب عمرك

Migo Mishmish said...

حبيبى جورج
انت شرفت ياحلو؟ انا تقريبا عرفت مين هو صديقك المبالغ فيه ..انا عندى برضه صديق تانى مبالغ فيه ..جميع فانلاته الداخليه فيها تلات خروم ماركه ..طيب وغلبان برضه وهو مش فى مصر دلوقتى ..مفجوع فجعه ممكن ياكل البقرة ب...اها والراعى ماشي وراها ..صديقى المبالغ فيه صاحب عمرى كله هوو صاحبى التالت المدهول على عينه و اللى مش عايز يتجوز لغايه دلوقتى مش عارف ليه ..صديقى المبالغ فيه عنده صفه مهمه جدا هى الحظ فهو محظوظ جدا بس الحظ خلاه يسافر لكنه واحشنى جدا جدا عشان بقالى سنتين ونص ماشفتهوش ..نفسي اقابله مرة واحد يوم الجمعه الصبح ونشرب قهوة ونغلب صاحبنا التالت فى الطاوله قصاد 100 الف متفرج

رئيس جمهوريه نفسى said...

انا بقى نفسى يكون عندى صديق مبالغ فيه بس للاسف لحد دلوقتى ملفتش يمكن ظروف شغلنا بتخلى وقتنا ضيق لانى اكيد كلهم محامين زى فالصبح متنتورين فى المحاكم وبالليل كل واحد فى مكتبة يمكن علشان اللى بيتجوز بيكون وقتة انضغط اكتر واحتل اكبر مساحته الاولاد يمكن العيب مين
بس اهم حاجة ربنا يخليليكم لبعض ويديم الود بينكم

Migo Mishmish said...

سياده رئيس الجمهوريه
شرفت البلكونه
ربنا يكون فى العون ياباشا ..مهنه المحاماه مهنه شاقه جدا زى مهنتنا الى هى التدريس ..بس الفرق ان احنا عندنا اجازات كتير عشان كدا ممكن نتقابل
بس الى اقصده ياريس ان مش شرط الشخص دا يبقى صديقك ممكن يبقى حد تانى ..دور كويس هاتلاقى الشخص دا اكيد ..هو بيبقى عامل زى الجندى المجهول المعلوم ..ممكن يبقى جارك او حد من قرايبك ..ومن غيره الصورة تبقى ناقصه
استغل اى مناسبه عندك ودور فى المدعوين يمكن تلاقيه
تحياتى ميجووووو

Anonymous said...

حبيبي ميجو اشكرك من كل قلبي علي اللي انت كاتبه ده اكتر حاجه اسعدتني انك حاسس حبي لك و للجميع بس انا حاسس ان الكلام ده كتير علي اوي ونفسي اكون استاهل الكلام ده و اتمني اني اكون جانبك في كل المواقف اللى تحتاج ان يكون حد جانبك فيها و زي ما انت شايفني صديق كويس انا شايفك صديق رائع و ربنا يديم حبنا لبعض اخوك ........... المباغ فيه

Anonymous said...

حرام عليك يا ميجو صديقك (ميرو)طيب جدا ويتمنى أى إنسان أن يكون له صديق مثله وعلى فكره هو صديقى أناأيضا ودائماماأتفاءل به فى مباريات الأهلى التى نشاهدها سويا ودائما الأهلى يكسب.

Anonymous said...
This comment has been removed by a blog administrator.
Anonymous said...
This comment has been removed by a blog administrator.
Anonymous said...

حبايبى ميجو و مشمش ازيكم .انا المره دى مش هاكتب ليكم انا هاكتب لعمو عصام انا باشكرك يا عمو عصام على كلامك عني وكويس ان جات الفرصه اللى اشكرك على استضافتك لي دايما لو فيه ماتش او مافيش و اشكرك اكتر علي مساعدتك لي في تثقيف نفسى من مكتبتك الكبيرة ومن معرفتك الاكبر و انا عايز اقول ان عمو عصام وش السعد علي الاهلى و دايما لما باتفرج عنده بنكسب ماعدا ماتش واحد مابحبش افتكره و مره تاني باشكرك يا عمو عصام على كل حاجه بتقدمها لى ميرو المبالغ فيه

Anonymous said...

ازيكوا يا جماعة عاملين اية يارب تكونوا بخير كلكوا انا اول مرة اكون معاكوا فى البلكونة انا حابب اتكلم عن صديقك المبالغ فية لانة ببساطة اخويا الكبير اللى مقدر استغنى عنة ابدا ابدا انا مش هاعلق على اللى كتبتوا يا ميجو لكن انا هاعلق على كلام صديقك نفسة نفسى يبطل جملة انا ماستاهلش .... يابنى انتى تستاهل اكتر من كدة مليون مليون مرة لانك ببساطة عملة نادرة من المستحيل انك تلاقيها فى الزمن دة او فى بلدنا دية خلى عندك ثقة فى نفسك وفى قدراتك . نفسى تستغل او تشوف نصف امكانياتك اللى كلنا شايفنها هاتبقى شىء اكتر من رائع ربنا يخليك لى يا اخويا الكبير
اخوك الدكتور

Alkomi said...

ياعم ميجو دانت مرزق

و صديقك ده نعمة و اللي يرفسها يعمى

Migo Mishmish said...

انا كمان عايزة اقول لصديقي المبالغ فيه انه ذوق وكويس بطريقه تضايق. دانا ساعات ببقى مش عارفه الاحق على ذوقه واخلاقه ازاي. عارفين البني ادمين اللي بيحرجوك بذوقهم. اهو صاحبنا ده زيهم ببقى عايزة اقوله كفايه كده انا تعبت. وانا بطبعي احب ارخم عالبني ادمين وانكد عليهم حياتهم
for fun
علشان اغير المود يعني. واحد ذوق زي ده اتعامل معاه ازاي. ايام ما كنت بعمل رجيم. كنت عامله زي اللي مبطل السجاير على اساس انه ما يشتيربهاش لكن ميكسفش حد عزم عليه بيها. انا كنت مكسفش حد يجبلي شوكلاته ابداً. وبعدين هو عرف اني بحبها لكن مابشتيريهاش بقه كل جمعه لما نتقابل في الكنيسة الاقيه جايبلي بلاطة شيكولاته معاه. وطبعاً كنت بستناه بفارغ الصبر واقطع الورقه وافضل اكل في الشوكلاته من غير حتى ما اعزم عليه ولا اقوله شكراً. الا بعد ماخلص بربع ساعه. وبرضه لازم يجيب الشوكلاته كل اما يقابلني. لا وغير كدة كمان بعد ما اتجوزت بقه لما يجلنا البيت لازم يجبلي معاه شوكلاته.
والنبي واحد زي ده مش يزهق
لانه بيخيليك تحبه بطريقه مبالغ فيها
وارهانكوا انه لما يقرا الكلمتين دول هلاقيه جايبلي كرتونه شوكلاته وطالع بيها على السلم ومش هيركب الاسانسير علشان يحسس نفسه انه تعب في الهديه
وانا طبعاً مش هكسفه
;-)
love,
MishMish

Anonymous said...

حبايبي د.دودو و مشمش و ميجو ربنا يخليكم لي يا اخواتي انا فعلا اقتنعت اني انسان ممكن اكون كويس علشان ربنا ادانى فى حياتى ناس زيكم وانتم فعلا نعمه من السما و بجد مش لاقي كلام اقوله لكم انا حايش الدموع من عيني بالعافيه ربنا يخليكم لي اخوكم المبالغ فيه

Desert cat said...

ازيكو يا اهل البلكونة وايه اخباركو
وحشتونى وحشتونى وحشتوووووونى
انا داخله اغنى لكو
لانى الحقيقة مش عندى صديق مبالغ فيه
ولا نص الربع
لان من وانا صغيرة كنا نتنقل فى اماكن كتير على حسب شغل السيد الوالد
فكنت كل لما اعمل صداقة وتبتدى تبقى قوية الاقي العزال بتتلم والدنيا بتتغير من حواليا
لدرجة انى بطلت اعمل صدقات بقى كله معارف .. لدرجة انى بدات لما الاقى حد يحبنى اوى احدد انا من العلاقه معاه

تحياتى ميجو
محبتى مشموشه

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق