يوم الجمعه اللي فات عملت كوبايه النسكافيه بتاعه الاستمورنج واستنيت مجاميجو يجب الجرايد. وطبعاً خطفت منه المصري علشان اقراه قبله واعكنن عليه - مش عارفه بعمل كدة ليه - المهم فتحت الجرنان من الصفحة الاولى على غير العادة وشوية وبعدين مقدرتش امسك نفسي من الضحك. قام ميجو راح بصاصلي بنظرة كلها استعباط وقالي: اتهبلتي خلاص؟ ايه اللي في الجرنان يضحك قوي كدة؟
قولتله بص الخبر ده قام واخد الجرنان وضحك قوي وقال: ايه الهبل ده صحيح!!!؟
الخبر بقه كان نصه كدة
اه والنعمة واللي مش مصدق ان في واحد عاقل ممكن يقول الكلام ده يخش عاللينك ويقرا الخبر بنفسه
الحج بتاع الإسكان قاللك مع ان الناس بتوع الدويقه هما السبب في وقوع الجبل عليهم لكن الحكومة برضه هتطلع احسن منهم وتعملهم حملات توعيه في المنطقة بعد نقلهم لمساكن التطوير خلال المرحلة الجايه عشان تعرفهم طريقه استخدام الحمامات والاحواض
بس الخبر مابينش إزاي حضرة الحج المسئول بتاع الإسكان وصل للنتيجه اللاوذعيه ديه. على رأي ميرو يعني اللي وقع الجبل واحد كان واقف يـ.......... - يتبول يعني بس بالعاميه - من فوق!!!!!!!!!!!!. قولتله ممكن يا ميرو ليه لا وتلاقي مواسير الصرف عندهم لفوق زي المداخن اللي بيحطوها محلات الكفته. وده التفسير المنطقي الوحيد لكلام الحج. لان الجبل هو اللي وقع على الدويقه مش الدويقه هي اللي وقعت عالجبل
وبعدين محدش قال برضه ايه اللي بيعملوه بتوع الدويقه في الحمامات والاحواض غير اللي - لا مؤاخذة - بنعمله . وبعدين طالما الناس ديه جامدة كدة مش المفروض نحرص افرض راحوا عند الهرم وعملوا بيب بيه هناك - لا مؤاخذه - ووقعوه بقه هنعمل ايه احنا؟
ثم فين وزير الثقافه من الحوار ده. لما في حاجة اسمها ثقافه حمامات واحواض محدش قالنا عليها ليه؟ إزاي يعني ما يبقاش في عنها برامج في النيل الثقافيه. إزاي معتز مجبش واحد من بتوع الاسكان مسئول عن ثقافه الحمامات يعلمنا ازاي نعمل بيب بيه كووووووووول
بلاش التليفزيون ليه الحج ما وضحش الحملات ديه هتتعمل فين؟ هل هتبقى جنب المراحيض العامة في الشوارع ولا في الحزب الوطني. طب حلو لما يطلعوا بتوع الاخوان يصطادوا في الميه العكرة ويعملوا هما الحملات ديه ونروح نحضر. يقوم يطلع علينا نفس الحج المسئول يقول الحملات بتاعه الاخوان من برة المنهج انما الاسئله هتيحي من نماذج الوزارة. زي ما عملوا مع المدرسين في موضوع الكادر
وهل علشان الواحد يحضر الحملات ديه لازم يكون واقع على بيته جبل ولا ممكن واحد عادي لسه مفيش حاجة وقعت علي بيته يحضر بإعتبار ما سيكون يعني. ما هو الواحد لازم يبقى مستعد تخيل انت بقه ساكن في عمارة فيها 2 او 3 معندهومش ثقافة حمامات واحواض تقوم العمارة واقعه ده مش بعيد لو مكنش في جبل جنب العمارة يعملولنا انهيارات ارضيه
بجد يا جماعه الموضوع ده جامد جداً ومحتاج فعلاً وقفة مصريه. ما ينفعش اي واحد كدة يخش الحمام والسلام لازم يفكر الاول ايه عواقب تصرف اهوج زي ده على المجتمع وسلامة المواطن وامن الدولة
Love,
MishMish
25 comments:
او يوزعوا على بتوع العشوائيات بامبرز ويبقى ريحوا وارتاحوا والله ما انا عارفه طفل يموت فى المحله فى البلكونه يقولك ثقافه الوقوف فى البلكونه
كل مصيبه يقولك ثقافه
طيب هما معندهمش ثقافه استخدام الدم الاحمر ولا انهم يشموا على دمهم شويه ويعتقونا لوجهه الله من الهبل والبردعه اللى عاوزين يلبسوها لنا
الله يحرقهم يا رب
حلوه البلكونه دي اول مره اجي هنا
كده يا ولاد ما حدش يقولي ان فى هنا بلكونه وفي شاي كمان
بصوا هو اصلا احنا السبب فى كل المصايب الى بتحصلنا
واحنا ولاد ....هوهو اساسا عشان قاعدين فى ام البلد دي
ومع ذلك الحكومه مستجدعه معانا وسايبانا نعيش ونبرطع فى بلد ابوهم
ولو سمحتوا بقى كل واحد يعمل بيبيه بالراحه مش عايزين قرف
انا شلت المراره من خمس سنين
طيب اسمعوا البق ده عشان مهم
انا بعد ما علقت باحكي لجوزي قالي لا يا بنتى دول كانوا بيكلموا عن احواض السباحه
قلتله الحاجه مشمش بتقول انهم قصدهم على الدبليو سي
قالي لا روحي شوفي اللنكات لانى ايامها قريت ان السبب فىالانهيار ده هو ان الفلل الى معموله فى اعالي المقطم وحمامت السباحه بتاعتها والجناين الىحواليها هى السبب
لان تسريب الميه ده من فوووووق للهضبه الى هى فى الاساس هضبه جيريه عمل الانهيارات دي
والمفروض انه كان ممنوع احواض السباحه والزراعه كده فوق
بس طبعا احنا ما نقدرش نزعل اصحاب الفلل عييييييب بقى
ومن هنااااااااا نقدر نحول الكلام
بدل ما نقول حمامات السباحه واحواض الزرع
نقول حمامات واحواض المواضنين ولاد الهوهو الى قاعدين فى علب سردين تحت دول
طبعا انا رغيت اكتر من البوست بتاعك بس معلش بقى اصل ده طبع الرغي بقى معلش
الصدفه السعيده خلتنى اتشرف بالقاعده فى البلكونه الشيك دي
ابي الجميله
ما هو لازم يبقى في حد غلطان علشان
الفضحيه العالميه اللي حطت على دماغ الحكومة وخصوصاً ان في بلاد متبرعه للعالم ديه بالاسم
فقروروا يلبوسها للناس برضه وبما ان الناس ديه لا ليها في الطور ولا الطحين قالك بس العالم ديه مش مثقفه
اما بالنسبه لثقافة الدم الاحمر اللي بتتكلمي عنها مش موجودة لان اللي بيجري في دمهم حبر ارزق او طحينه وده بينعكس على عبقريه تحليلهم للامور
love,
MishMish
صبرها يا رب - واحنا كمان
اولاً نورتي البلكونة وارجو ان الشاي يكون عجبك وفي حاجات تانيه غير الشاي بس اطلبي ان شالله يكون كانز عصير قصب ما تغلاش عليكي
بصي يا ستي التعليق بتاعك خلاني ارجع تاني للخبر وابص عليه واللي فهمته منه ان السبب في الموضوع ده ان مواسير الصرف بتاعه بيوت العالم بتوع الدويقه كانت مش سليمة فكانت على طول المجاري ضاربه وفي رشح في البيوت والكلام ده تراكم بالاضافه طباعاً للمنتجعات السياحيه اللي فوق ومحدش بيجيب عنها سيرة
بس هي الفكرة ان المباني سواء ان كانت فوق المقطم او تحتيه بقالها كام سنه علشان توقع الجبل بالطريقه ديه
تاني حاجة المنطقه ديه بعد الانيهار الاولاني في سنه 1993 اتصرف على الابحاث اللي اتعملت عليها مليون و800 الف جنيه وطبعاً اتحطيت في دوسية بلاستيك شيك وخدوها الموظفين بتوع المحافظة لمراتاتهم علشان يطلعوا عليها بطاطس لانها عامله زحمه في دواليب المحافظة ومحدش بص فيها. هل الدراسه ديه ماقلتش ان المجاري ضاربه في الدويقه او الجبل فوق الدويقه. وبعدين موضوع ان الجبل مش عارفه مكون من عنصر ايه كدة وده بيدوب في الميه كلام اهبل. انا خريجيه علوم قسم كميا. وبما ان الصخور ديه بتتأكل بالميه ماعملوش ليه زي يوم سته اكتوبر وفتوتها بخراطيم الميه زي خط بارليف. ده الجرنان كان كاتب ان اجهزة الحفر باظت من صلابه الصخور
حاجة تالته زاهي حواس داير حايس ما بين المحافظة وهيئة الاثار عامل يقول المياه الجوفيه اللي تحت الهرم بتهدد الهرم وممكن يقع او تحصله مشاكل محدش اتحرك ليه. وكل اللي حصل ان زاهي حواس قال على محافظ الجيزة انه ما بيفهمش غير في بنا عشش الفراخ انما الاثار والحاجات العظيمه ديه بعيد عن اختصاصه. وطبعاً المحافظ رد عليه بانه مش متخصص وان مفيش مياهخ جوفيه ولا حاجة والهرم لسه موجود يبقى مافيش داعي للشوشرة لانه مابيفهمش
يا ستي السادة السئولين عايشين في ميه البطيخ ومطمنين ان محدش هيحاسبهم
Love,
MishMish
نسيت اقولك يا قمرايه
ان فيه باحث حذر من خمستاشر سنه من انهايارات المقطقط وهما مازالوا متربسين دماغهم يا قلبى
حاجه تكسف و الله يامشمش
ماهو لازم يدبسوها في أي حد و الموضه اليومين دول في الكوارث انهم يلزقوها في المواطن الغلبان و هما عارفين العادات السيئه بتاعتنا
زي كنت واقفه في اشاره و شوف كتابه علي جراح بتقول لا تتبول هنا في الخلف مصلي
المصيبه لما المسؤلين الأفاضل هما اللي يتزعموا الحملات الهلاميه دي
الله يكون في عوننا بجد
تحياتي ليكي و لميجو
جامد جدا البوست ده، أنا فطست علي روحي من الضحك
فعلا الموضوع محتاج لوقفة مصرية جديدة.... واضح إن وقفاتنا المصرية هاتكتر شوية اليومين الجايين دول
انا شايفة الحقيقة ان السيد المسؤل عنده حق يا مشمش
يعنى هو الراجل مش جرب مرة يروح يوقف فوق الصخرة ويعمل إئح ولا جرب يعيش هو واسرته فى 3 متر ويبقى فى حمام مشترك وممكن اللى ماشى فى الشارع يشوف اللى جوا الحمام
ده راجل متعود على سيراميكا كيلو باترا او حتى رمسيس الاول
وبالتالى اكتر حاجه على حد علمه يعرفها ان المياة الكتير بتسبب تشققات وانهيارات .. وبما ان الناس دى مش عندها مياه وبتشترى كل اسبوع جركن او على حسب ما يكون فى فلوس اذن المياة المتوفرة ايه ؟؟؟
هو البوووووول
وسلامات يا بلد
لوووووووووووووووووووووووووووول
ضحكتيني يا مشمش
ايه ده بجد مكنتش اعرف ان مشكلة الدويقة حلها في كيفية معرفة الطريقة الامثل للشخ و لا مؤاخذة
بجد دي حاجة ظريفة اوي
شفتي الحكومة مدلعة الشعب ازاي؟؟
انتي امتى معاد ولادتك صحيح
عاوزين نحتفل بالبيبي لما يجيي
تحياتي
المرة دي عاوزة شاي بلمون لاني مزكومة بشكل سخيف
يانهار مش فايت حتى الحمام بقى مشكله ومحتاج ثقافه ؟؟؟حسبى الله ونعم الوكيل
على فكره يا مشمش يعنى إيه محتاجين وقفه؟؟أظن الوقفه فى الحمامات للرجال فقط مش كده ؟؟؟
الاجندة الحمراء
ما هي الحكومة عماله تلبس طاقيه ده لده. ما هو لازم في حد يبقى غلطان وطبعاً عمره ما هيكون الحكومة. حتى لو الكلام ده صحيح هو مين المسئول عن وجود الناس ديه تحت المقطم او فوقيه. يعني يوم ما ربنا خلق مصر خلق معاها الجبل يعني مش المقاولين العرب هما اللي بنوه. فأكيد في حد في تاريخ مصر عنده حب استطلاع وعرف طبيعه الجبل وقال الكلام ولا كتبه على ورقه.
انتي عارفه الحكومة عامله زي واحد قاعد في شقه السباكة بتاعتها بايظة وكل حاجة فيها بتنقط فبدل ما يصلح المواسير جاب بكل فلوسه جرادل واستلف من الجيران وادين علشان يجب جرادل تانيه يحطها تحت الحتت اللي بتنقط
مع انه لو شغل دماغه كان بكل الفلوس ديه مش كان غير السباكة بس ده كان غير الشقه كلها
Love,
MishMish
اهلاً يا احمد باشا. منور يا نجم
تصدق انا انبسطت قوي ان ضحكت على البوست واتمنى انه يكون ادى الغرض منه
القطوطة
وحيات ولادي اللي لسه فاضل علي اولهم شهر عمري ما فكرت فيها كدة. بس تصدقي وجهه نظر جامدة جداً. قال وانا اللي كنت فاكرة اني جيبت الديب من ديله
Love,
MishMish
اسف يا مشمشه اتاخرت فى الرد شويه علشان كنت بثقف نفسى علشان اعرف ارد عليكى. بصى بقى الى حصل فى القطاميه سببه اننا ماعندناش ثقافة حمامات يبقى قويلى على البلد يلى السلامه على شان احنا معندناش ثقافه فى اى حاجه ولا عندنا حاجه اصلن
تعالى شوفى الدنيا هنا فى امريكا عامله ازاى انا بقالى 3 سنين هنا و لا سمعت عن عباره غرقت و لا الكونجرس اتحرق و لا المسرح القومى الامريكى اتحرق ولا جبل وقع على دماغ الناس و قالو نقص ثقافه دى نقص دم او نقص احساس
بقوليك اه بطلى تخطفى الجرنال من ميجو لحد لما توليدى علشان متطلعش البت كوثر عندها ثقافه زى اللى عندنا
حفصه رجعت تاني يا رجاله
لولولولولولولولي
حمدلله على السلامة يا ستي والحمدلله انك رجعتي للتدوين تاني. واحلى كوبايه شاي بلمون علشان خاطرك
بالنوسبة بقه لموضوع الشخاخ - لا مؤاخذة - فالسيد المسئول محددش هو الغلط كان فين بالظبط. اصل الموضوع ده بالذات موضوع بتاع ربنا والفروق الفرديه فيه تعتبر معدومة او نادرة. ما هو بتوع الدويقه بيعملوا زي بتوع مصر الجديدة. يعني بتوع الدويقه دول كانوا بياكلوا ايه؟ بيب بيه
اما فيما يخص ولادتي وحصولي على لقب ام فلانه فهتكون في نص 11 ان شالله. في ليله مفترجه وهي وقفه عيد ميلادي
وشامه ريحه مش هي من ناحيه ميجو بيرمي على انه مش هيجيبلي هديه في عيد ميلادي قال علشان مصاريف الولادة والمستشفى. بس على مين انا مككن اقعد ماسكه نفسي جامد وماروحش اولد غير لما يجيب الهديه. والا هخلي البت جوه ويبقى يوريني بقه هيعمل ايه
Love,
MishMish
اه يا عمو وبعدين الكلام عن الثقافه خلالهم فتحوا على نفسهم فتحه. هما مش بيدوروا على شغلانه لوزير الثقافه بتاعهم في اليونسكو. طب ايه العمل بقه لو سألوه في اليونسكو وهما بيعملوله انترفيو سمعنا انكوا في مصر بتسيبوا الناس تعمل بيب بيه من غير ما يحضروا ندوات توعية او حملات تدريبية هل الكلام ده صحيح؟
اما المقصود من الوقفه هو - من وجهه نظري - بما ان الرجاله طول عمرهم واقفين ومجاش من وراهم غير وقوع الجبل فأظن الوقت جه ان الستات هي اللي تقف والرجاله تقعد. او الاتنين يقفوا
ههههههههههههههه بس في الحالتين الزروطة هتبقى للركب
هتوحشني لغايه لما اشوفك
Love,
MishMish
الصديق جورج المثقف
يا ابني متنخدعش باللي انتوا فيه. هي امريكا ديه بلد. ده ربنا غضبان عليكوا. شوف انت لما بتنزل مصر بتاخد قد ايه مواصلات
مش بيقولوا المؤمن دايماً منصاب. اهو كل اللي بيحصل ده اصابات علشان يوم القيامة المصريين مش هيتحاسبوا هيخشوا كلهم الجنه. وهيبقى لينا عند ربنا باقي كمان.
انما انتوا الحياه عندكوا ماسخه ملهاش طعم. الاكل نضيف. الناس محترمه. سيادة قانون. حريه. انتخابات بجد مش خرمنط. الكفاءه هي اللي بتحكم اختيار الفرد مش علشان واحد ابن خالته ساعي في الشركة يتعين مدير. انا مش عارفه انت مستحمل القعده هناك ازاي بصراحة
مين كوثر ديه يا كابتن؟ انا هاسمي بنتي اسم يناسب المرحله اللي احنا فيها. هاسميها "حريقه" زي الناس اللي سمت زلزال بعد زالزال 12 اكتوبر. ثم موضوع خطف الجرنان ده مش مقصود. اللي انا بقصده اني ارخم على ميجو وانكد عليه وخلاص. فبدور على اي حاجة تعكننه. مع انه ابن ناس جداً وراجل محترم لغايه الاخر. وبالامانه معرفش انا بعمل فيه كدة ليه
اه وعلى هو بيسلم عليك
Love,
MishMish
ربنا يسعدك يا مشمشة..يسعدك مرتين...مرة علشان تعليقك الجميل على مونتي ومرة عشان التدوينة دي:)
نهاره ابيض
عزيزتى مشمش ...رجاء حار إستعجلى ولادتك وخللى الهديه عليالأن أنا نفسى خد بنتك فى حضنى زى ماكنت باخد أبوها فى حضنى زمان وعلى فكره ومن غير زعل أنا هاحبها أكتر منك ومن ميجو وكل شويه أتخيل منظرها وتقاطيعها وتقريبا رسمت لها صوره كامله فى خيالى ومستنيها على أحر من الجمر وكل يوم أقول هانت وعشان خاطرى بلاش تحجزيها كتير لأنك بتعاقبينى أنا مش ميجو.
الله..الوطن ..اما نشوف
يا اهلاً وسهلاً بيكي ومتتخيليش انا ببقى مبسوطة قد ايه لما بكتب حاجة تضحك الناس وتبسطهم
Keep in touch
Love,
MishMish
عمو عصام
علشان خاطرك انت بس هولد في ميعادي
وانا معنديش مانع انك تجيبلي هديه
بس ميجو برضه لازم يجيب هديه
اقولك حاجة خليه يجبلي الهديه قبل عيد ميلادي
يا عمو اصل ديه مسأله مبدا. ميجو عايز يطنش وانا مش ممكن اسمح بحاجة زي ديه ابداً
عموماً انا مش هازعل لما تحبها اكتر مننا احنا الاتنين. بس هي تيجي
صليلنا كتير
Love,
MishMish
طيب الحمد لله ان انتي كمان اخدتي بالك من الخبر ومش انا لوحدي اللي متغاظ
بس انتي نبعتيني لحتة كدة مكنتش حاططها في حسابي خالص موضوع الهرم
بجد نقطة مهمة احيكي عليها
انشاء الله مش اخر زيارة
اهلاً تامر باشا
بص هو مفيش اخبار مؤكدة عن موضوع الهرم ده. بس كان من فترة كدة زاهي حواس قال ان الهرم عايم على مياه جوفيه او مجاري مش فاكرة للأمانه. واشتكى لمحافظ الجيزة وبعدين محافظ الجيزة قاله انت مبتفهمش حاجة ورد زاهي حواس والموضوع كبر وبيقولولك كان فيه شتيمة بالاب والام وحاجات كدة
فممكن يكونوا بتوع الدويقه هما السبب. طايحيين بقه في البلد عماليين يعملوا بيب بيه في كل حته ومصر مستهدفه زي مانت عارف
ومش بعيد هما يكونوا السبب في حريق مجلس الشورى. بس ديه لا مؤاخذه كانت غازات
Love,
MishMish
لووووووووووووووووووووول
يخرب بيت شيطانك يا مشمش
موتيني من الضحك و انتي بتردي على تامر
لا بجد مش معقولة
"
طايحيين بقه في البلد عماليين يعملوا بيب بيه في كل حته ومصر مستهدفه زي مانت عارف
ومش بعيد هما يكونوا السبب في حريق مجلس الشورى. بس ديه لا مؤاخذه كانت غازات
"
Post a Comment