Tuesday, April 14, 2009

امن دوله


بعد ان ابتلع الظابط الشاب حبوب الضغط ..سالته .. يافندم هو مش مفروض تسألو المدرسه وتسألو المدرسين والطلبه الى فى الفصل وتتحققو من الواقعه ..دى تهمه كيديه ياباشا ..رد عليا الظابط الشاب : احنا مش فاضيين للحاجات دى ..احنا بنتعامل مع المستندات والورق الرسمي ..يعنى الولد عمل محضر رسمي ..وحظك انه معملش شهاده طبيه ..دا لو عملها وجاب تقرير فيه اصابه اكتر من 21 يوم علاج يبقى انت رحت فى داهيه ياحلو .....انا عايز اساعدك عشان انت شكلك ابن حلال ..والواد بيفترى عليك ..اصله لما جالى هو وامه حسيت انه بيكدب لانه مكانش فيه اى اصابه وحسيت من كلامهم انهم كدابين وعايزين يقرفوك وخلاص..اصل انا اعرف الاشكال دى من وسط ميت مليون واحد ..الخبرة بقى ...بقولك ايه سؤال بصراحه .. انت مسيحى؟
انا: ودى هاتفرق فى ايه يافندم؟
الظابط :لا تفرق كتييييير ياحلو
انا : قصدك انك ضربته عشان انا مسيحى وهو مسلم؟ .. بس انا ماضربتوش اصلا ولو ضربته هاضربه عشان واد قليل الادب ومش متربى مش عشان هو مسلم ..انا عمر فى حياتى ماتكلمت فى الموضوع دا او اتعاملت على اساس الدين
الظابط : انا مصدقك انك ماضربتوش ..بس لما ييجو تانى هاظبطهملك
انا : ازاى ياباشا؟
الظابط : اول ماييجو تانى هاقولهم ان طرفيى المشكله هايتحولو لامن دوله عشان القضيه خدت بعد تانى ..المدرس مسيحى وانتم مسلمين ..وكدا لازم تتحول لامن دوله ..ودا مش فى مصلحه ابنك
انا : وفعلا الكلام دا؟
الظابط : طبعا ..لو فيه اى مشكله بين مسيحى ومسلم علطول بتتحول لامن دوله حتى لو كانت عاديه
انا : بس انا مش عايز العب بالكارت القذر دا ..دا غير ان الست نفسها ممكن تلعب على الوتر دا وتقول انى ضربت ابنها عشان انا متعصب
الظابط : الغايه تبرر الوسيله ..انت شكلك ابن ناس ..ودول عالم لبط مش هاتسلك معاهم ..يعنى ممكن يتبلو عليك ويقرفوك ..وانت الخسران ..واضح ان ام الواد هى الى سايقه الدنيا وجوزها فى الطراوة ..ممكن تقولك دا المدرس اتحرش بابنى فى الحمام ولا عمل معاه مصيبه ..وساعتها يبقى انت مستقبلك ضااااع ..وحلنى بقى على ماتثبت ..ولو اثبت انك بريئ ..هاتكون سمعتك باظت ..هنا الناس مابتصدق تشبط فى اى قصه ..
انا : يانهار اسود ..دنا مكنتش شايفها كدا خالص ..اعمل الى شايفه ياباشا
الظابط : عليك نوور انت كدا فى السليم ..سبنى اخوفهملك و هاجبرهم على الصلح ..وهاخليهم كمان يبوسو ايدك عشان تتنازل انت عن المحضر ..انا متغاظ من الواد ابن الكلب دا انه قالك ابويا هاينفخك ..امال احنا بنعمل ايه؟ احنا الى بننفخ بس
انا : ولو انى مكنتش احب انى العب بحته الدين دى لكن طالما هايبقى كدا وكدا يعنى ..خلاص
الظابط خلاص روح انت وتعالى بكرة وهاكون ظبطلك المسأله ... بقولك ايه صحيح .. انا عايزك تدى درس للواد ابن اختى هو فى اولى ثانوى ..اصل المدرس بتاعه مش بيشرح كويس ماشي ؟
انا اوكيه ياباشا ..ومتشكرين على المساعده ..
الظابط : لاشكر على واجب ..بس ماتنساش بقى موضوع الواد ابن اختى
خرجت من القسم وقد تغيرت نظرتى الى المتهمين فقد كنت اتعامل معهم بنظرة مسطحه تصدرها لنا وسائل الاعلام ..وتعلمت الا اصدر اى احكام مسبقه على اى متهم ..فلم اكن اعلم ان مشاهده الممثلين على المسرح من وسط المتفرجين مختلفه تماما عن مشاهدتهم من الكواليس ..

25 comments:

Anonymous said...

فعلا انا قريت من فترة فى اليوم السابع ان مدرسة وولية امر اضطهدوا طفل مسيحي و لما ابوه عمل محضر و قال ان السبب ان ابنه مسيحي الظابط قاله الموضوع هايتحول امن دولة و ماكانش قصادهم غير الصلح
كلام الظابط صح على فكرة اي مشكلة بين مسيحي و مسلم امن الدولة بتستلم الملف على طوول
كويس انه طلع جدع معاك بس ربنا يستر و مايكونش بيورطك اكتر

نيران said...

خلي بالك بقى من ابن اخته.. لحسن ينفخك بعد الامتحانات زي مدرس ابنه

و لو انت كنت مسلم؟ و الطالب مسلم، كان ايه اللي هايجرى،؟
كان عادي تتبهدلوا
او العكس لو انت مسيحي والطالب مسيحي؟
مش كدا الضابط دا و امثاله هم اللي بيزيدوا الحساسية بين المسلمين والمسيحين؟

Anonymous said...

عزيزي ميجو
المشكلة مش ف المسيحي والمسلم المشكلة الكبيرة ف ان اي حد ممكن يرمي بلاة على اي حد تاني لمجرد انة مش عاجبة او ان بينهم مشاكل وحلنى بقى بهدلة ومرمطة عشان تثبت انك صح او انة بيفترى عليك
ببساطة شديدة مابقاش الناس عندها استعداد تدول ع الحقيقة وتشوف الصح مين والغلط مين الازمة الحقيقية ازمة ضمير الناس مابقتش تحكم ضميرها قبل ما تتصرف
ام البنات

Anonymous said...

انت عارف بقى اللي يغيظ ف الموضوع انة الظابط دة قوام عمل عليك مصلحة وانت طبعا ماتقدرش تقول لأ عشان ماتبهدلش نفسك وتدخل ف مشاكل ومعاك ربنا بقى على ماتثبت ان الولد بيكدب
فالحل انك توافق على انك تدي ابن اختة درس عشان يظبتلك الولد ويخلصلك مشكلتك بسرعة

منتهى قلة الادب وقلة الضمير بجد

تاني ام البنات

^ H@fSS@^ said...

حسرة عليكي يا مصر

islamz said...

دخلنا فى مشكلة العصر .. التفريق بين المسلم والمسيحى وتخويفهم ببعض ..

اما نشوف باقي الحكاية هتوصلنا لفين .. بس انا مش متفائل

Migo Mishmish said...

يابسطاويسي
منور البلكونه ..
وحياه ابوك ياشيخ تهدى اللعب شويه وبلاش الاندفاع الهجومى دا ..انا حاسس دايما ان انفعالاتك بتسبق تفكيرك ودا مش حلو يا باستو ...خليك دايما موضوعى ومش متحيز ..يعنى المسيحيين مش ملايكه ولا المسلمين ..هما بنى ادمين بيغلطو و مش معصومين ..بلاش طريقه الاهلى والزمالك دى ..انت راجل مدون وعقلانى ومفروض اننا على المدونات نبقى تفكيرنا احسن من كدا ..
المسأله مابقتش مسيحى ومسلم .المسأله بقت قله ضمير سواء كان من المسيحى او من المسلم
تحياااااتى يا باستو ..واقعد بقى اشرب الشاى على رواقه وفكر فى الكلمتين الى قلتهملك
هاخش اعمل حاجه جوة واجيلك
ميجووووو

Anonymous said...

انا مش شايف علاقة بين كلامي و ردك
انا بقول حاجة قريتها فى مجلة و ماهاجمتش حد
و فعلا امن الدولة بتستلم اى مشلكة بين مسيحي و مسلم زى مالظابط ماقال

ثم على فكرة انا مش مدون

AHMED SAMIR said...

هو في كدة؟؟؟؟؟

Desert cat said...

انا فى البداية قولت ايه الظابط العسل ده وماله متعاون اوى كدا ليه فى الاخر طلع علشان ابن اخته هو فى حد بيخدم ابن اخته دلوقتى طب كان عايزك تدى ميدو درس لما يكبر شوية
:))
بس بجد كدا الموضوع بقى سبهلله على الاخر
بس مش تقلق يا ميجو الناس الكويسة بتبان والبيئة برضه بتبان
ربنا معاك

تحياتى

Migo Mishmish said...

بسطاويسي تانى
يامعلم انا بتكلم عن اسلوبك دايما فى الحوار هجومى ..مش بتكلم عن المرة دى وبس ..انت دايما بتخش تهاجم وبعدين تسأل فيه ايه..صدقنى فيه ناس كويسين جدا جدا ومتفاهمين .. بلاش كل حاجه نلزقها فى الدين وبس
تحياااتى
ميجووووو

Migo Mishmish said...

نيروووووو
منورة البلكونه
احنا سايبين اصل المشكله وبنمسك فى الفرع ..شفتى بلدنا وصلت لحد فين ؟ ياريتنى ماكنت سحبت ورقه الامتحان من الواد ..حاجه بسيطه اتحولت لفتنه طائفيه ..هى دى مصر يانيروووو
ميجووووو

Migo Mishmish said...

ام البنات
منورة البلكونه
انا متفق معاكى كل الاتفاق ان بلدنا بقت فيها ازمه ضمير ..الحمدلله ان الموضوع خلص بدرى بدرى ..كان ممكن اطلع فى تسعين دقيقه والعاشرة مساءا على اساس انى مجرم
بعد اذنك عشان عندى حصه مع ابن اخت الباشا
تحياااااااتى ومنورة البلكونه
ميجووووووو

Migo Mishmish said...

حفصه
منورة كالعاده
قف للمعلم وفه التبجيلا ..دا حال المعلم منيل بنيله
تحيااااتى
ميجوووو

Migo Mishmish said...

اسلامز
منور البلكونه
لازم ماتبقاش متفائل عشان الحكايه دى بقت استهبال وزى ماقلت بقت مشكله العصر ..لاننا متدينين تدين زائف
ميجووووووو

Migo Mishmish said...

استاذ a samir
منور البلكونه
ايوة فيه كدا وكدا وكل ماتتخيله فى البلد دى ..دا اقل من الواقع بكتييييير
تحيااااتى
ميجووووووو

Anonymous said...

أحب اطمنك ياأخ ميجو
أسلوبي مش هجومي ولا حاجة و كل اللى بعمله انه بعبر عن رأيي
و لسيادتك كامل الحرية فيما تعتقد

Migo Mishmish said...

بسطاويسي
صدقنى انا مش زعلان منك ..ولك كامل الاحترام فى التعبير عن رايك ..البلكونه للجميع وتساع جميع الاراء والتوجهات ..انت ضيف اساسي من ضيوف البلكونه ولو ماجتش بنحس بغيابك ..بس زى مانت عبرت عن رايك ..انا كمان عبرت عن رايي ..والاختلاف فى الراى لا يفسد للوز قضيه ..
تحياااااتى ياباستو واوعى تزعلى
ميجووووووو

Unknown said...

كنت بمر على المدونات قلت لازم امر عليك واقولك كل سنة وانت بالف خير وكل المصرين
تحياتي والى الامام

Hassan El Helali said...

كل سنه واحنا طيبين يا ميجو ويا مشمش

Magi Mostafa said...

اول حاجه كل سنه وانتم طيبين
تانى حاجه
معلش الى يعيش يا ما يشوف
وعلى فكره حطك كويس ان ربنا وقعك فى ظابط طيب شويه
اصلا انا سمعت مره ان وليه امر راحت المدرسه ضربت مدرس بالجزمه قبل كده وطلعتله مطواه
بس متقلقش جت ليمه 20 غرزه فى راسه ودراع ورجل مكسوره بس

واضح انك محظوظ ومامتك دعيالك

على باب الله said...

فعلاً حسرة عليكي يا مصر

ربنا يسترها معاك و معانا

Anonymous said...

That's sad to know how things are going there, but in the same time, this part is ridiculous
"انا متغاظ من الواد ابن الكلب دا انه قالك ابويا هاينفخك ..امال احنا بنعمل ايه؟ احنا الى بننفخ بس"

amunraa said...
This comment has been removed by the author.
amunraa said...

ابقى طمنا عليك يا ميجو وربنا معك
وسلملي على ساندو

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق