Sunday, January 2, 2011

دم اخيك صارخ إليّ من الارض


وكلم قايين هابيل اخاه. وحدث إذ كانا في الحقل ان قايين قام على هابيل اخيه وقتله
فقال الرب لقايين: اين هابيل اخوك؟
فقال: لا أعلم. أحارس انا لأخي؟
فقال: ماذا فعلت صوت دم اخيك صارخ إلىّ من الارض. فالان ملعون انت من الارض التي فتحت فاها لتقبل دم اخيك من يدك. متى عملت الارض لا تعود تعطيك قوتها. تائهاً وهارباً تكون في الارض
سفر التكوين اصحاح 4 الايات من 8 الى 12

11 comments:

جوزيف بطرس said...

بقالى يومين مش عارف أنام... أنا من الاسكندرية

Migo Mishmish said...

ومين سمعك
MishMish

Tears said...

معاكى فى كل كلمة و بضم صوتى لصوتك بس ح اضيف ان فيه خاين كبير جدا بينا و بيتواطىء على الشعب كله مش قضية مسيحيين و مسلمين

التطرف اللى سمح بيه فى القنوات و الزوايا و الجامعة و ملصقات الشوارع و فى اماكن كتير اوى هو النظام السياسي عشان يلهى الناس و يخليهم يمسكوا فى بعض بدل ما يطالبوا بحقوق و حرية

و برضة نفس النظام ده هو اللى بيسمح للقوى الخارجية تعمل اللى هى عايزة بمزاجه و اوعى تصدقي ان الامن ما كانش يعرف يمنع اللى حصل لان اصلا القاعدة ارسلت تهديد صريح و نشر فى الصحف من شهرين و حددوا اليوم و الاماكن المستهدفة و برضة ما كانش فيه امن متواجد

طيب مالفتش نظرك ان قبلها فى حادث انهيار مصنع اسكندرية سابوا الناس تتبهدل و يادوب بعد سبع ساعات راحت الاسعاف بينما فى حرائق غايات اسرائيل كانت مصر اول يد تساعدهم

طيب بلاش

شفتى ازمة السكر اللى كانت فى اسرائيل الشهر اللى فات فمبارك امر بارسال المخزون بتاعنا ليهم عشان السعر عندهم ما يغلاش و النتيجة ان الناس فى مصر اتبهدلت و مالقتش سكر

شفتى الغاز اللى بيتباع بسعر باقل من سعره العالمى لاسرائيل و بنخسر فى تمنه و النظام رافض ينفذ حكم المحكمة بايقافه

شفتى تصريح نتنياهو ان مبارح اهم صديق لاسرائيل؟

تصريحات رئيس المخابرات الاسرائيلى السابق فى مذكراته المنشورة

''''لقد تطور العمل فى مصر حسب الخطط المرسومة منذ عام 1979. فقد أحدثنا اختراقات سياسية وأمنية واقتصادية فى أكثر من موقع، (((( ونجحنا فى تصعيد التوتر والاحتقان الطائفى والاجتماعى لتوليد بيئة متصارعة متوترة دائماً ومنقسمة إلى أكثر من شطر ))))" ~ عاموس يادلين (( رئيس المخابرات العسكرية الإسرائيلية السابق ))...

ياريت نربط ده باعترافات الجاسوس المصرى الاخيرة اللى قال فيها ان اسرائيل لها عملاء فى مناصب مهمة عندنا و بتبث فتاوى متطرفة و تساعد على تغذية الارهاب و بتمولة و الدليل ان الاحصائيات بتقول ان القاعدة قتلت من المسلمين و العرب اكثر من غيرهم و لم يحدث ان قاموا بتفجير واحد ضد اسرائيل او يهود

الداخلية همها تأمين النظام السياسي و بس

و طول ما الشعب ده او جزء منه بيايد الحزب الوطنى و بيحشدوا عشانه فى كل انتخابات طول ما ح نفضل فى كده و ماحدش ح يبقاله سعر لا مسيحي و لا مسلم

و اعتقد التزوير من اجل انجاح النائب عبد الرحيم الغول اللى تسبب فى كارثة نجع حمادى العيد اللى فات ابلغ رسالة ان ماحدش له سعر و لاحظ ان لسه لم يعاقب حد من الجناه فى نجع جمادى بينما مثلا فيه قضايا اخرى كان الحكم فيها سريع جدا

على فكرة قله من المسيحيين فهموا امبارح ده اخيييييرا و عشان كده لما الانبا يؤانس بدأ فى توجيه كلمة شكر لمبارك بعض الشباب كانوا ح يضربوه و اسأل اللى كان حاضر و شاف

اقرى و دورى ح تلاقى ان فى الوثائق الامريكية اللى بيفرج عنها بعد سنوات ان الملك حسين مثلا كان له راتب سنوى من جهاز المخابرات عندهم و كان بيبلغ بكل شىء و فى نفس الوقت فى نفس الوثائق ان همه كانوا شاريين مسئولين كبار فى الاتحاد السوفيتى بيخربوا من جوه

اسفه على الاطاله بس الموضوع اكبر كتير من اننا نلبسه فى القاعدة و نسكت خاصة ان القاعدة برضى بتشتغل لصالح اسرائيل و الدليل انها لم تقتل فى عمرها يهودى واحد و لا عملية واحدة فى اسرائيل و اغلبه ضد المسلمين فى باكستان و افغانستان و العراق

Desert cat said...

انا داخلة عندك ومكسوفة اوى من نفسى
ومش عارفه اكتب اقولك ايه لأن اى كلام أكيد مش ليه أى لزوم دلوقتى
ربنا يعزى أهالى الشهداء

Migo Mishmish said...

Tears
بصي كلامك صح
انا عارفه ان الشيطنه بتاعه اليومين دول مش طبيعيه
بس الغلط الاكبر على اللي باع دماغه ونفسه للي بيستخدمة
شوفتي القرضاوي يوم 31 ديسمبر كاتب ان مفيش مانع من تهنئة النصارى باعيادهم
يا سلام الا هو الكلام الكويس محتاج فتوى
يعني العادي هو قله الادب
سليم العوا اللي قال الكنايس فيها اسلحه خفي فين امبارح
مطلعناش الاسلحه ديه ليه
ماردناش بيها على اللي قتل فرحه الناس ليه
البابا سبب الفتنه مطلبش حمايه اجنبيه ليه
معرفش غلط الاخرين لا يبرر غلطي يا تيرز

قطة
ولا تتكسفي ولا حاجة دانت بعد اللي حصل ده المفروض ترفعي راسك لانك مش معاهم
انتي بتقومي بدور وبتتشمي وبتتهاجمي
انتي وقليلين معاكي تقدري تقولي انا فعلاً برئيه من دم هؤلاء الابرار

حداداً على مصر
MishMish

ELVIRA said...

انا مش عارفة أقول أيه لكن أنا أعصابى بتغلى
قلبى معاكى و مع كل مصرى بجد من غير النظر إلى دينه

كفاية أن الفكرة اللى مسيطرة على الأيام دى هو أنى قفدت إيمانى بالحرية و الرأى المعارض لازم الناس دى تنتهى من الوجود أنا ارفضهم بكل الأشكال
و معنديش أى أعذار ليهم أبداً

جوزيف بطرس said...

أقذر خبر سمعته: منفذ العملية هم أقباط المهجر!!!؟؟؟؟

يعنى نفوا فى الأول أن المنفذ يكون من الإخوان المسلمين، و بعد كدة نفوا أنه يكون مصرى من الأساس، و بعد كدة نفوا أنه يبقى القاعدة، و بعدها نفوا أنه يكون من جماعة المجاهدين أم ترتر دى اللى نشرت أسامى الكنائس المستهدفة، و اتهموا إسرائيل فيها كعادة المصريين فى اعتبار إسرائيل شماعة كل المصايب، و بعد كدة اتهموا أمريكا، و فى الآخر ولاد الكلب بيتهموا المسيحيين نفسهم!!!! تيييييييييييييييت (كلمة قبيحة لا مؤاخذة!!) أنا هقولكم مين اللى فجر الكنيسة... أمى اللى فجرتها!... ليه بس كدة يا ماما؟؟؟

Mafrousa said...

كل سنة و انتم طبين و بخير
انا تقريبا عندى اكتئاب من ساعة اللى حصل
الارهاب عزيزتي بيفرق بين كل الملل دون تفرقة
لانه الغاية عنده فرق تسد
و المشكلة فى امخاخ البشر اليومين دول
مش هاين عليهم يستعملوها
انا بقول لازم رقابة على كل الخطب سواء اكانت فى الكنائس او المساجد
و رقابة ايضا على القنوات الدينية لانها فيها بلااااااااااوي و من الجانبين
زي ما فيه ناس مستنيرة فى الجانبين
يوجد ناس انا و انتى عارفينهم عاوزين يولعوها
و مش شرط اسرائيل على فكرة
ده اسرائيل تلاقيها عاملة فرح على التوتر ده
ربنا يستر و يحفظنا من كل سوء و يرجع الهدوء النفسي من تاني
تحياتي و كل سنة و انتم طيبين

Ms Venus said...

ما كل ده قايلنا عليه ربنا فى الكتاب

كل ده احنا عارفيه


مش جديد ولا غريب


بلْ تَأْتِي سَاعَةٌ فِيهَا يَظُنُّ كُلُّ مَنْ يَقْتُلُكُمْ
أَنَّهُ يُقَدِّمُ خِدْمَةً ِللهِ.
وَسَيَفْعَلُونَ هذَا بِكُمْ
لأَنَّهُمْ لَمْ يَعْرِفُوا الآبَ وَلاَ عَرَفُونِي.
لكِنِّي قَدْ كَلَّمْتُكُمْ بِهذَا حَتَّى إِذَا جَاءَتِ السَّاعَةُ تَذْكُرُونَ أَنِّي أَنَا
قُلْتُهُ لَكُمْ

Migo Mishmish said...

ELVIRA
فعلاً كل اما الواحد يفكر في ان طالما احنا نفسنا حد يسمعنا ويدينا حقوقنا من واجبنا اننا نسمع غيرنا ونديله حقوقه ومش من المفروض ان اكره غيري لانه مختلف معايا بس الاشكال ديه تخلي الواحد يخاف من الديموقراطيه إذا اطبقت وفي ناس زي ديه في وسطنا ونلف في دواير ونرجع لنفس نقطه البدايه
انا الوحيد الل صاحب قضيه ومش من حق حد يضطهدني. اما فلان فلا

جوزيف
في خبر اقذرن من اللي انت سمعته
بيقولك يا سيدي ومن غير شتايم واشارات بالايادي والاصابع واصوات تشبه شخير النائم
في جريدة الوفد على الانترنت تقول الدكتورة زينب عبد العزيز
آن أن أن اه طش
كشفت المؤامرة وعرفت مين اللي عمل كدة الا وهو الفاتيكان
لانه صاحب مصلحه ويريد التدخل في شئون الشرق الاوسط
http://www.alwafd.org/أخبار-وتقارير/الشارع-السياسي/تفجير-الكنيسة-شماعة-التدخل-الغربي-في-مصر
المقال كان منشور على موقع الوفد لكن من الواضح انهم شالوه
وده لينك للمقال
http://www.senksar.com/vb/showthread.php?p=216611
حتى انا ساعتها علقت على الخبر وقولت ونروح بعيد ليه لغايه الفاتيكان
مالبابا شنودة اقرب هو اللي اجر الكموني علشان يقتل بتوع نجع حمادي وبلغ الامن على كنيسة العمرانيه وطلب منهم انهم يضربوا بالرصاص الحي وبعدين لما لاقى ان الموضوع مش جايب همه قالك نخش على التقيل
وبعت جاب ناس يفجروا كنيسه القديسين
او قد يكونوا الضحايا هما اللي اجروا الولاه ده علشان طمعانين في فلوس التعويضات علشان مش لاقين يجيبوا لحمه بعد هذا الصيام الطويل
اه لو ينفع اقول اللي في بالي
حداداً على مصر
MishMish

Migo Mishmish said...

Mafrousa
وانتي طيبه

بصي اهم من القنوات ديه قناعتنا الشخصيه
هل ينفع تسألي واحد من فريق هل افراد الفريق التاني هيخشوا الجنه ويجاوب اجابه صحيحه
المشكله ان كل واحد فينا فعلاً شايف ان التاني باطل ومقضينها
انا صحابي كلهم مسيحين
انا صحابي كلهم مسلمين
لكن ساعه الجد الوضع مختلف
بصي اصل مبطلناش نحكم على بعض ونخاف من بعض مش هنتغير
القنوات ودعاه الكراهيه من الطرفين لو مكنوش لاقوا اللي يشتري منهم كانت بضاعتهم بارت
يمكن القنوات ديه كانت اتقلب قناوات مسابقات واغاني هابطه
مش من حقي اقرر مصير غيري ومفتاح الجنه مش مع واحد هايخش بسرعه وهايقفل ومش هيدخل حد بعديه
كل المؤمنين بالله يساهمون في احتقار اسمه بسبب افعالهم
ان كنا اصحاب حق ودياناتنا سماويه - كما نردد - فكيف لا نستطيع التكيف مع بعضنا البعض


Ms Venus
اكيد طبعاً اللي حصل ده وعد مش حادثه
انا عارفه ان اللي عمل كدة كان بيعمل شغله زي ما اللي استشهدوا كانوا بيعملوا شغلهم
بس المشكله في شعور الناس و مجرد التفكير في ان في ناس دلوقتي نايمه مبسوطة وشمتانه
الفكرة في ايه اللي يخلي واحد يتجرد من الشعور الانساني ومقدرش اقول بقى زي الحيوانات المتوحشه لانها مابتقلتش ابناء جنسها
يعني ايه واحد يقرر النهاردة ينهي حياه واحلام وطموح ناس
يعني ايه يفجر ناس كانت بتصلي ولو حتى لصنم في حين ان في ناس قضيت الوقت ده في السكر والسهر والخطيه والسرقه والقتل
اذا وجودهم مافادهوش على الاقل ماكنش بيضره

حداداً على مصر
MishMish

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق