Sunday, September 21, 2008

حرمت يا بوجي


حرمت يا بوجي..... حرمت.....حرمت ترمرم..... حرمت

اللي يأكل فوق عن طاقته ...... اه اه

تزعل منه قوي معلقته...... اه اه

والشوكة تعضه في لسانه ...... اه اه يانا


فاكرين الاغنيه ديه كانت جات في بوجي وطمطم. مش عارفه ليه ديه اول حاجة جات في بالي وانا بقرا الخبر ده "محامي هشام مصطفي: هيئة الدفاع تدرس «الدية» في القانون الإماراتي" في المصري اليوم بتاع امبارح. ماهو اصل الموضوع كده كان باين من اوله على انه شد ودان من حد كان زعلان. وبما اننا في رمضان شهر الصوم والعبادات والاعتكافات وكل الحاجات. فالظاهر ان الاخ اتش مصطفى. لما اعتكف قعد يفكر في خطيته واعترف وتاب وقال حرررررررررررمت


يعني هو معقول يا ناس اللي قتل 1034 بني ادم تتشال عنه الحصانه بعد اربعييييييييييييييين يوم من الحادثة علشان يطمنوا انه مش هو بس اللي ساب مصر لا ده خد معاه المدام والاولاد والكلب بتاعه ووبعت جاب زواده فضله خيركم شوية مش وملوحه وفطير مشلتت من البلد علشان غربته هتطول ودلوقتي اسم الله عليه قاعد في البلكونه في لمبم بيشرب الفايف اوكلوك تي وفي ايده سيجاره ولا على باله. والاخ اتش قتل واحدة مسمعناش عنها غير بعد مامت ولغايه دلوقتي برضه لسه مش عارفينها يقوم تتشال عنه الحصانه بعد كام ساعه من الحادثة. لا وايه وجابوه هو والراجل اللي قتلها. وبالمناسبه ديه انا عايزة اشكر الحكومة ووزارة الداخليه بالذات على التزامها بتعين 5% معاقين من اجمالي العامليين بها ومش المعاقين جسدياً بس لا ده ضمت ليهم المعاقين ذهنياً كمان. والله الوزير بيتعب يا جماعه


ولقولها حل يا جدعان وربنا فرجها عليه وهيدفع الديه كأنه كان سايق عربيه على الطريق الزراعي وخبطله بهيمه وراضا صاحبها. وزي ما قال اتش مصطفى انه كانت لديه ثقة كاملة في القضاء المصري، احنا كمان كنا واثقين في القضاء المصري زيه بالظبط

Love,

MishMish

12 comments:

Anonymous said...

عزيزتى مشمش الحصانه تم رفعها عن اتش مصطفى لسبب بسيط وهو ان دولة الامارات احرجت الحكومه المصريه بانجازها التحقيقات والقبض على القاتل فى زمن قياسى ووجهت لحكومة مصر سؤالا واحدا (نحاكمه ولا تحاكموه؟؟؟)فاختارت حكومتنا الرشيده محاكمته فى مصر يمكن تعرف تلم الموضوع شويه او تهربه للندن بحجة العلاج تصورى الامارات وصلت فين واحنا نزلنا لفين ؟؟؟.

Migo Mishmish said...

اه يا عمو عندك حق
المصيبه ان القانون مبيمشيش غير على اللي زي واللي زيك.. هما ممكن يحاكموا ايمن نور ونوال السعداوي وسعد الدين ابراهيم. ممكن يسجنوا محمود عبد الكريم. ودول ماعملوش جرايم دول كل اللي حصل انهم قالوا رايهم. لكن اتش مصطفى وبقيه المجموعه الكلام ده مش ليها. انت عارف امبارح في الدستور كانوا كاتبين ازاي مستر اتش بيقضي يومه في السجن. بيقولولك انه بيقضي معظم اليوم في ملعب التنس. شوفت الضغوط النفسيه اللي بيتعرض لها. وطبعاً نتيجه الضغوط ديه نفسيته تعبت يا عيني وخافوا لا ينتحر فبقى في لواء بينزل يقعد معاه في الزنزانه بتاعته يسليه. والنبي صعب عليا خصوصاً في اخر المقال لما قال لما هيطلع من السجن هيقدم شكوي للداخليه علشان القهر النفسي اللي بيتعرضله المساجين. ما هو الراجل عنده حق برضه. ملعب تنس بس. مفيش خيام رمضانيه. مفش مبارايات كورة لايف ده حاجة تقصر العمر
Love,
MishMish

Empress appy said...

يعنى شده ودن ولا قرصه ولا اى حاجه زى ما قولت فيه خيوط كتير مبهمه يا حبيبتى
وبعدين متثقيش فى الصحافه بتاعتنا اوى ولا يمكن فعلا يكون بيعمل كده والله ليه لا انا مرحتش قبل كده السجن ههههههههههه

Desert cat said...

مشموشة ازيك
مستر اتش لو مش جه مصر بعد الفضيحة اللى عملتها الامارات والجواب الى بعته عادل معتوق للحكومة المصرية كان زمانه بيتحاكم فى الامارات زيه زى اى مذنب
لكن مستر اتش دلوقتى فى مصر بيدير اعماله من داخل السجن بالرغم من ان طارق اخوه هو اللى رئيس مجلس ادارة المجموعة دلوقتى .. لكن من الواضح ان اتش برضه مش مريح نفسه .. ادارة السجن عامله له مكتب خاص جنب الزنزانة وسكرتيره الخاص بيروح يقعد معاه من الصبح للفطار وعنده اتنين موبايل وجهاز كمبرور
ده قاعد فى الفورسيزون يا قلبى مش فى السجن
هى الناس دى بتتسجن برضه

Alkomi said...

اه يا مدينتي

اااااااااااااااااااه مدينتي

على عز انا هجري و ابوس ايده

مش هعمل كدة تاني ولا اكيده


ربنا يخسف بيهم كلهم الارض

دلوقتي بيدرسوا الدية دي لوحدها قرينة ضلوع في القضية

و سلميلي عالقانون

Migo Mishmish said...

ابي الجميله
بصي يا ستي هو من الواضح انه كان محتاج يتأدب . لو كنتي اتفرجتي على برنامج الحقيقه اليومين اللي فاتوا كنتي خدتي بالك من ان الموضوع كبيرررر قوي. الناس اللي كانوا جايبنهم في البرنامج كانوا عايزين يثبتوا حاجتين. اولاً السكري مقتلش سوزان. لكنه راح اداها برواز صور بس وكانت حجة المحامي بتاعه انه قضى شويةالايام اللي قعدها في دبي مع واحدة لا مؤاخذه يعني مكنش ممكن يخرج من الفندق في الفترة ديه. ومش عارفه ليه هو كان بيحاسبها بالساعه ولا ايه
والحاجة التانيه اللي عايزين يثبتوها ان مستر اتش هو المحرض على الجريمه. وديه برضه مش حاجة جامدة قوي هياخدله فيها بتاع سنتين ولا تلات سنين. هيعدوا هوا في منتج مزرعه طرة.
انما الهايل بقه في الموضوع انهم كانوا جايبين واحد لاوزعي من بتوع مجلس الشعب معرفش هو جاي مع الديكور ولا ايه قالك اللي قتل سوزان ده طرف تالت بس ماقلش هو مين. انا في إعتقادي انهم الاسياد والعياذ بالله
يلا إياكش يولعوا كلهم على بعض.
Love,
MishMish

Migo Mishmish said...

قطوطة
ازيك يا سكرة شفتي عاملين ايه في اتش مصطفى. والنبي يا ختشي الراجل مقطع قلبي.بيقولولك نفسيته تعبت من الحبسه ده حتى فتحوله الجامع اللي كان مقفول في السجن علشان يصلي الجمعه. شوفتي الناس خايفه عليه لا يعمل في نفسه حاجة إزاي. لحسن حد يقول انهم فتحوا السجن علشان خايفين من ربنا ولا حاجة. ده الفطار يا عيني بيجيله السجن من الفورسيزون في علب وتلاقي مفيش في السجن ميكروويف فياكل الاكل بارد. شوفتي زهق اكتر من كدة. والناس برضه مش سايبنه في حاله. يلا
Love,
MishMish

Migo Mishmish said...

محمد باشا
مستخبي فين يا نجم. بس سيبك انت جبت اللي فيها. هو الشيطان اللي حمض النفوس من بعضها. وهو خلاص اتعلم ومش هيعمل كدة تاني
Love,
MishMish

Anonymous said...

الكوميدي يامشمش في موضوع الديه دي ان احنا اساسا مش ماشين بالنظام ده زي السعوديه و حتي في السعوديه مش معني ان حد قتل حد و دفع الديه انه مايتعاقبش
فيه حاجه اسمها حق عام و حق مدني يعني كده كده فيه محاسبه
بس انتي عارفه بقه عندنا حيعملوا نظام خاص بيهم هما و بس و عارفه اهلها يبقوا بيستهبلوا لو قبلوا الديه كأنهم بيضيعوا دم بنتهم في الهوا عشان شويه فلوس حتي لو ملايين و ادينا قاعدين و حنشوف
صباح الفل ياجميل

Anonymous said...

عزيزتى مشمش....أحب أن أطمئنك على الأخ إتش فقد إستجابت وزارة الداخليه لطلبه وجارى الآن إنشاء ملعب جولف بسجن(آسف بفندق). المزرعه

Migo Mishmish said...

لا محنا الشيستم عندنا هيبقى مختلف. - على راي الله ...الوطن ... اما نشوف -احنا عايشين في جملوكيه مصر العربية. الراجل هيدفع الديه وخلاص كدة وهيقعدوا يقولوا لاهلها خلاص اللي راح مش هايرجع تاني. وسامحوا الراجل علشان ربنا يحطة في ميزان حسناتها
وبعدين الراجل ده عنده لفوس متلتله ومارضيش يسيب الـ 12 مليون دولار اللي اداهم للسينيورة وجاب واحد مختلف علقياً يقتلهاله علشان مش عايزة تجيب اللي عليها. تفتكري هيدفع الديه وبعدين يشوف حكايه الحق المدني والكلام ده. لا ...لا يا ماما لا
Love,
MishMish

Migo Mishmish said...

الحمدلله يا عمو
ده الراجل كان هيطق من تقل دم سيادة اللوز اللي بينزل يقعد معاه في الزنزانه ده
love,
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق